Read lubukusu Chis. 25 Bible Online

Chis. 25 - lubukusu bible

Chis. 25

¹Chino chosi chili chisimo cha Solomoni nicho babaandu ba Hesekia omwami owa Yuda baandika.

²Luli luyali lwa Wele khukisa bibiindu, ne kakhali luyali lwe babaami luli khuyiima bibiindu.

³Nga buniina bwe likulu ne buli bukali, ne nga buleeyi bwe sibala ne buli bukali lukali, kamebaasio ko mwami kosi se kamanyikhana tawe.

⁴Norusia kamasengeli khukhwama mu fwesa, oupa kumukuba anyoola nisio arumikhira khukhola bibiindu,

⁵rusiao bamayaanu ebweeni wo mwami, ne ndebe yewe eye bubwami ekhemisibwe mu buluungi.

⁶ Okheruriirisia ebweeni wo mwami, namwe wekhola khuba omundu owe lukoosi tawe,

⁷sikila buli bulayi oboolelwe bali, “yiicha wikhale ano,” khukhila ne bakhwinyosia mala bakhwikhasie abuundu e asi akhali e lukoosi tawe. Kamakhuwa niko wabona ne chimoni chowo

⁸akhabireera khangu mu bukhalaki tawe, sikila okhakhole oriena ekhumaliilikha, nga chirani wowo ne akhuaambie chisoni?

⁹Ng'oona weng'ene bulomani buuliio akari wowo ne chirani wowo ne muli mweng'ene, ne mukhabuulana kamakhuwa kenywe tawe,

¹⁰ne busa oulila akhola ario amureerera chisoni, mala lisina liowo lionekha biise bioosi.

¹¹Elomo elomekha mu siise silayi sisienyekha, eli nga bibiaamo bie esahabu mu ndubi eye efwesa.

¹²Nga embete eye esahabu namwe limili lie esahabu, akhaba omundu omukesi yesi ali ario narafwira omurekeeresia.

¹³Nga ebarafu mu siise sie likesa, akhaba omurumwa omweyikinwa yesi ali ario khwaabo bamuruma, asangaasia babaami bewe.

¹⁴Nga kamafuumbi ne embeo biikhalimo efula tawe, akhaba omundu owifumia ali, ali ne siianwa ne se aana tawe yesi ali ario.

¹⁵Ne liliekhaliilikha omwami anyala aulila, ne lilomaloma lilayi liioleelesia kumwoyo.

¹⁶Nonyoolile bubuukhi khomba bukhwola bwong'ene, busa bukhusinya mala orusie.

¹⁷Okhacha wa chirani wowo buli siise tawe, akhola ario asinyikha ne nawe mala akhubiila.

¹⁸Omundu orusia buloli khu wasie ali nga eruungu eye liie, namwe nga embalu namwe luembo lulwoki.

¹⁹Lilieyikina mu mundu okhali omusuubilwa tawe mu biise bie butinyu, lili nga liliino libolile namwe sikele simiukha.

²⁰Oyo owimbila kimienya omundu obeelele, ali nga omundu ofuula engubo khu ndaalo eye embeo namwe nga chumbe mwikoonjo.

²¹ Omusiku wowo aaba nali ne njala muelesie siakhulia alie, ne aaba ne bulesia muelesie kameechi anywe,

²²sikila aba olikho omutiuukha kumulilo khu murwe kwewe, ne Omwami acha khukhuruunga.

²³Nga embeo eye bunaswa nereera efula, ne omundu owe kamakuto areera lirima.

²⁴Nabulayi wamenya khunju khungaaki, khukhila khumenya no mukhasi nalung'uunyo.

²⁵Nga kameechi kamanyifu khu mundu owe bulesia, chili chirio chilomo chindayi khukhwama mu sibala sie aleeyi.

²⁶Nga sitoolola sie kamatosi namwe esebele etubukhile, ali ario omundu omuluungi ofukiilila bumayaanu.

²⁷Se buli bulayi khukhoomba bubuukhi bukali tawe, namwe se buli bulayi khukhwiyimila lukoosi tawe.

²⁸Omundu okhekhaliilikha tawe ali nga lukoba lutechulwe kamasiisi, mala luli khwasie khukhwibwaakalwa,