Read lubukusu Chis. 26 Bible Online

Chis. 26 - lubukusu bible

Chis. 26

¹Nga ebarafu mu siimiyu namwe efula mu likesa, luli lurio lukoosi lukhenyekhana tawe khu musilu.

²Nga tindikiriri mu khupurukha khwayo, Lundi nga opiicho mu khupurukha khwayo, sili sirio silaamo siikhali ne sifuno tawe, se sireera butinyu tawe.

³Siboko sili sie farasi, ne chisenyenge che munwa khu punda, ne esiimbo eli eye khukhupa basilu.

⁴Okhakobosia omusilu khuloondekhana ne busilu bwewe tawe, okhakhola orio wafwaanana ne naye.

⁵Kobosia omusilu khuloondekhana ne busilu bwewe, busa akhola ario ebaasia ali yesi ali omukesi.

⁶Orumania burume bwewe khubirira khu musilu, ekhala bikele biewe omwene lundi ereerera butinyu.

⁷Nga bikele bio omuleme ne bikhali ne bukhala tawe, luli lurio lusimo lulomwa no musilu.

⁸Nga omundu oboela libaale mu lusia, ali ario oyo oeelesia omusilu lukoosi.

⁹Nga liwa ne liuna kumukhono kwo mumeesi, luli lurio lusimo lulomwa no musilu.

¹⁰Nga omulasi owe buyiingo nalasa buli mundu, ali ario oyo oaana kimilimo khulwe kumuruungo khu musilu namwe khu mumeesi.

¹¹ Nga embwa nelia kamarusio kayo, ali ario omusilu owila mu ke busilu bwewe.

¹²Wabonakho omundu welanga omwene omukesi? Lilieyikina liliio khulwo musilu khukhila khuniye.

¹³Omukara aloma ali, “Etalang'i eli khu ngila! Etalang'i eli khu ngila che lukoba!”

¹⁴Nga lulwiiki ne lwisiubila khu bupata chalwo, eli nga omukara khu sitanda siewe.

¹⁵Omukara aroonga mu sibuumba, ne kakhali khuyila emunwa butinyu khu niye.

¹⁶Omukara elaanga ali ali omukesi, khukhila babaandu saba baana kamakobosia ke bukesi.

¹⁷Omundu owikhupa mu bulomani bukhali bubwewe tawe, ali nga otiila khu maru ke mbwa elikho ebira.

¹⁸Nga omukwamalalu olasa chinjeso namwe buembo bubwira,

¹⁹ali ario omundu obea owasie, naloma ali, “Ndikho kholakho busa kumwinyawe!”

²⁰Khulwe khutaamba chiikhu kumulilo kusima, ne niio omukuti ataamba khulomana mbao.

²¹Nga kamaanda khu maanda kaburukha, ne chiikhu khu mulilo, ali ario omundu olomana khulwe khukhola bulomani buchiililile.

²²Kamakhuwa ko mukuti, kali nga siakhulia sinulu, kachilanga elala mu mubili mwoosi.

²³Nga efwesa eyafuunikha sibuumba, chili chirio chilomo chindayi ne kumwoyo kumumayaanu.

²⁴Oyo obiila ekisa mulomo chewe, mala abiikha bubeeyi mu mwoyo kwewe.

²⁵Ne nalomaloma bulayi okhamusuubila tawe, sikila mu mwoyo mwewe bilimo bibiindu bisinyisia saba.

²⁶Akhaba libiila liewe ne lifuunikhwa ne bubeeyi, bumayaanu bwewe bulibakalwa ebweeni we libuusiana.

²⁷Oyaba liloo omwene alilikwamo, ne libaale lilimiina oyo orakikha khulipiringisia.

²⁸Oloma bubeeyi abiila nibo alomalomakho, ne khulomalomaka kimilomo khureera libuna.