Read lubukusu Chis. 27 Bible Online

Chis. 27 - lubukusu bible

Chis. 27

¹ Okheniinia khu ke kumutikhinyi tawe, sikila sonyala wamanya kakeecha busiayo tawe.

²Lekha okundi akhufumie, okhefumia wamwene tawe, lekha omukeni akhufumie.

³Libaale lili lisiro ne kumuyekhe kwosi kuli kumusiro, ne kakhali lirima lio musilu lili lisiro khukhila bioosi.

⁴Lirima likali lili limemeu ne bukhalafu buukia, ne naanu onyala wekhaliilikha likhendekha?

⁵Lilikiicha lie abuwaanga, likhila busiime bwe mu bwikisi.

⁶Bukhupe nibwo onyoola khukhwama khu musaale bukhuyeeta, ne kakhali liliekwayila likali lio omusiku lili bubeeyi busa.

⁷Omundu owikuure aloba akhaba bubuukhi, ne kakhali khu we njala buli siindu siakhaba silulu siba sinulu.

⁸Nga enyuni erekukha khukhwama mu siswi siayo, ali ario omundu otaaling'a khukhwama mungo mwewe.

⁹Kamafura ne biiunya bulayi bie khukhwiakha bisiimisia kumwoyo, ne kakhali butinyu bwonaka kumwoyo.

¹⁰Okhebilila basaale bowo namwe basaale ba raraao tawe, ne oli mu butinyu, okhasaba buyeeti khukhwama khu wandaayo tawe, nabulayi chirani wowo ooli siimbi, khukhila wandaayo ooli aleeyi.

¹¹Ba omukesi, mwana owase, mala osangaasie kumwoyo kwase, nio enyala khukobosia oyo oufwochola.

¹²Omukesi abona butinyu mala ekisa, ne kakhali omusilu abwikhupamo mala aumiia.

¹³Bukula engubo eyo mundu owimeelela omukeni, ruungia kumusiingo owimeelela bareende.

¹⁴Omundu ounana kumutikhinyi, khukheesia owasie ne luyoka, alibalwa nga olikho omulaama.

¹⁵Efula namunyekeele, no mukhasi nalung'uunyo bifwaanana,

¹⁶nomukhiingilila oli nga okhiingilila embeo, namwe khufumbara kamafura.

¹⁷Sichuuma siakalanga sichuuma siasie, ne omundu eyiika khukhwama khu wasie.

¹⁸Omundu owaakila kumutuli alilia chinduli chakwo, ne omukholi oliinda omwami wewe alanyoola lukoosi.

¹⁹Nga bubweeni ne bung'enang'ena ne olola mu meechi, bulayi bwene kamebaasio ko mundu kokesia omundu oyo nga nali.

²⁰Emakoombe ne kumulilo se biliikura tawe, bulayi bwene chimoni cho mundu chosi se chinyalikha tawe.

²¹Enyuungu eye mu mukuba ekela efwesa, ne kumulilo kukela esahabu, ne omundu akelwa khubirira khufuma yewe.

²²Wakhachunga omusilu mu sibwili alala ne biakhulia, busilu bwewe se bulimururamo tawe.

²³Manya bulayi nga bibiaayo biowo ne bili, mala obiliinde bulayi,

²⁴sikila kimiaandu se kimenya mindali na mindali tawe, ne bubwami bunyala bwabao chiselukho choosi ku?

²⁵Bunyaasi ne buweele, mala bubuundi ne busisina, ne bunyaasi bwe chingulu bubusiibwe,

²⁶onyala wanyoola chingubo khukhwama khu bufuumbo bwe kamakheese, lundi wakula kumukuunda khukhwama mu rupia nicho okusiisie chimbusi.

²⁷Kamabeele kalibao khukhwama mu mbusi nga siakhulia siowo, sie babaandu be nju yowo nende sie bakholi bowo.