Read lubukusu Chis. 28 Bible Online

Chis. 28 - lubukusu bible

Chis. 28

¹Bamayaanu belukha akhaba omundu ne akhabatimania tawe, ne kakhali baluungi bali banyindaafu nga etalang'i.

²Sibala ne sikhola bumayaanu, siba ne babaami bakali, ne kakhali ne siba ne babaandu be limanya, sichiililila khuba ne kumuleembe.

³Omwami oupia sibi bataambi, ali nga efula eye ekhuungu, eyonaka biakhulia.

⁴Abo baloba lilaka bafumia bamayaanu, ne abo baliinda lilaka bayingana ne nabo.

⁵Babaandu bamayaanu se bamanyile bung'ali tawe, ne kakhali abo bayiima Wele Omunyali Owa Bioosi balimanyiile elala.

⁶Nabulayi omutaambi okeendela mu buluungi bwewe, khukhila omuiinda oli ne chingila chimbi.

⁷Oyo oliinda lilaka ali omwana omukesi, ne kakhali omusaale owe babaandu be kumuluungo, aambia raraawe chisoni.

⁸Oyo okuchisia kimiaandu kiewe, khulwe kumuruungo kumukali khu makobi, abuusila omundu ooli omulayi khu bataambi.

⁹Omundu okhaulila lilaka tawe, akhaba lisaba liewe lili lisinyisia.

¹⁰Oyo otiimia omundu omuluungi, amuyila khu ngila eye bumayaanu, alikwa mwiloo liewe omwene, ne kakhali balayi balinyoola kumukabwa kumulayi.

¹¹Omuyiinda ebaasia ali, ali omukesi omwene, ne kakhali omutaambi ooli ne limanya, amenyile khumukhilakho.

¹²Baluungi ne bakhila luyali luliio lukali, ne kakhali omumayaanu ne echa khu bwami, babaandu bekisa.

¹³Omundu ookisa bumayaanu bwewe, se aindiaala mwimenya tawe, ne kakhali obwiiyama mala abwikaana, alinyoola siisa.

¹⁴Ali ne khabi omundu oria Wele Omunyali Owa Bioosi buli lwoosi, ne kakhali oyo olumia kumwoyo alikwa mu butinyu.

¹⁵Nga etalang'i eulukhuma namwe nga sibulukhu sisirekeekhe khu khuupana, ali ario omwami omumayaanu owaamiia bataambi.

¹⁶Omwami otaamba limanya ali omukuluumi khu baandu, ne oyo obiila linyoola likhali lia ng'ali tawe ayindila.

¹⁷Kaaba bali omundu aaba ne eera okundi, lekha abe oyiiyayiiya khukhwola nga afwa, omundu yesi yesi akhamuyeeta tawe.

¹⁸Oyo okeenda bulayi alionisibwa, ne kakhali oyo owakoyaana alikwa mwiloo.

¹⁹Oyo olima kumukuunda kwewe alaba ne biakhulia bikali, ne kakhali oyo oloondelela kamakhuwa kakhali ne bukhala tawe, alinyoola butaambi bukali.

²⁰Omundu omusuubilwa alaba ne chikhabi chingali, ne kakhali oyo oakara khuindiaala alinyoola kumunaanio.

²¹Khubabila lubeka lulala se khuli khulayi tawe, ne kakhali omundu anyala akhola likhiika khulwe siakhulia silala siong'ene.

²²Omundu owe chinge aakara khunyoola kimiaandu, ne se amanya ali liliekoomba lilamwichakho tawe.

²³Oyo owiikiicha owasie ekhumaliilikha alatasa khunyoola busiime, khukhila omundu obea owasie ne kimilomo busa.

²⁴Oyo onuula raraawe namwe maawe, mala aloma ali, “Obwo se buli bumayaanu tawe,” se aukhana no mwifwi tawe.

²⁵Owe kumuluungo enyosia bulomani, ne kakhali oyo owiyikina Wele Omunyali Owa Bioosi aliindiaala.

²⁶Oyo owiyikina omwene ali omusilu, ne oyo okeendela mu bukesi alisikulwa.

²⁷Oyo oaana khu bataambi se alitaamba tawe, ne kakhali oyo obemana alinyoola bilaamo bikali.

²⁸Babaandu baabi ne becha khu bwami, babaandu babeene bekisa, ne kakhali ne babuna, baluungi beecha khu bwami.