Read lubukusu Chis. 29 Bible Online

Chis. 29 - lubukusu bible

Chis. 29

¹Omundu okaambilwa buli lwoosi nakhaulila tawe, alikhebulila busa akwiile mu butinyu nibwo akharuramo tawe.

²Baluungi ne bali khu bwami babaandu bekhoya, ne kakhali bamayaanu ne baamiia babaandu beloocha.

³Oyo owasiima bukesi asangaasia raraawe, ne kakhali omusaale owe baeeyi onaka kimiaandu kiewe.

⁴Khulwe bung'ali omwami akhola sibala siaba sie kamaani, ne kakhali oyo obukula kimiaandu mungila embi asibunia.

⁵Omundu olomaka chilomo khu wasie, ereka omwene luriimba.

⁶Omundu omumayaanu ereka mu bumayaanu bwewe, ne kakhali omundu omuluungi emba ne khukhwikhoya.

⁷Omundu omuluungi amanyile bung'ali bwo mutaambi, omundu omumayaanu se ali ne limanya nga elio tawe.

⁸Babaandu be kileki baambia lukoba, ne kakhali babaandu bakesi baosia lirima.

⁹Omundu omukesi aaba ne ayiingana no musilu, omusilu ayokela busa ne khuchekha, kumuleembe se kubao tawe.

¹⁰Babaandu babeeri babiila babaandu balayi, ne bayiima khukhwira balayi.

¹¹Omusilu ekesia lirima liewe lioosi, ne kakhali omukesi ekhaliilikha ne nalio.

¹²Omwami aaba ne arekeeresia ke bubeeyi, babemeelesi bewe boosi baliba bamayaanu.

¹³Omutaambi no mukuluumi balekhaana, Wele Omunyali Owa Bioosi abaelesia boombi chimoni.

¹⁴Omwami aaba ne akhalakila bataambi bulayi, bubwami bwewe bulibaao buli lwoosi.

¹⁵Esiimbo ne siiukuumo bireera bukesi ne kakhali omwana olekhwa busa ario, areerera maawe chisoni.

¹⁶Bamayaanu ne baamiia bumayaanu butasikha, ne baluungi balibona likwa lie bamayaanu.

¹⁷Ukuuma omwana wowo ne alikhuwa kumuleembe, alisangaasia kumwoyo kwowo.

¹⁸Niio bung'oosi bukhali tawe, babaandu se bekhaliilikha tawe, ne ali owe khabi oyo oliinda lilaka.

¹⁹Omukholi se aukuumwa ne kamakhuwa busa tawe, sikila akhaulila se acha khufukiilila tawe.

²⁰Wabona omundu ouutula chilomo chewe? Omusilu anyala eyikinwa khukhila niye.

²¹Oyo oelesia omukholi wewe lukoosi khukhwama mu bwana bwo mukholi oyo, ekhumaliilikha omukholi alibukula buli sisiindu nisio ali nasio.

²²Omundu owe burafu enyosia bulomani, ne omundu owe lirima areera bumayaanu bukali,

²³Lilielola lio omundu limukwiisia, ne kakhali oyo owe kumwoyo kwe liliboombia anyoola lukoosi.

²⁴Omusaale wo mwifwi, abiila bulamu bwewe omwene. Aulila silaamo, ne se abuula siindu tawe.

²⁵Liria li omundu lireera kumureko, ne kakhali owiyikina Wele Omunyali Owa Bioosi ali ne kumuleembe.

²⁶Bakali bayiima omwami abasiime, ne kakhali bung'ali bwama khu Wele Omunyali Owa Bioosi.

²⁷Omundu okhali owa ng'ali ali osinyisia khu baluungi, ne kakhali oyo owe ngila engololofu ali osinyisia khu mumayaanu.