Read lubukusu Chis. 3 Bible Online

Chis. 3 - lubukusu bible

Chis. 3

¹Mwana wase okhebilila kamekisio kase tawe, ne kakhali, lekha kumwoyo kwowo kuliinde kamalaka kase,

²Sikila kalikhutasa chindaalo ne kimiiko kie bulamu, ne buiinda.

³Okhalekha bubweyikinwa ne busuubilwa tawe, biboe mwikosi mwowo, biandike mu mwoyo kwowo.

⁴ Nio ocha khunyoola lifukiililwa ne efuma ebweeni wa Wele ne babaandu.

⁵Yeyikina mu Wele Omunyali Owa Bioosi ne kumwoyo kwowo kwoosi, ne okheyikina kamakesi kowo wamwene tawe.

⁶Mu ngila chowo choosi mukhebulile, ne niye alakololosia chingila chowo.

⁷ Okhekhola omukesi tawe, ria Wele Omunyali Owa Bioosi mala orure mu bumayaanu.

⁸Bino bilaba buonia khu mubili kwowo ne khukhuulusia mu makuumba kowo.

⁹Ria Wele Omunyali Owa Bioosi ne kimiaandu kiowo, ne bibiaamo biowo binyoa khukhwama bioosi,

¹⁰nio birara biowo bicha khwichula swa, ne chioochwa chenywe chikhechule endali lukali.

¹¹ Mwana wase, okhaleka siiukuumo sia Wele Omunyali Owa Bioosi tawe, namwe akhalua ne alikho akhwikiicha tawe,

¹² sikila Wele Omunyali Owa Bioosi abiiya oyo niye asiima, nga paapa ne abiiya omwana niye asiima.

¹³Ali ne khabi omundu onyoola bukesi, no mundu onyoola limanya,

¹⁴sikila nisio onyoolamo sikhila sinyoolekha mu fwesa, Ne bukhala bulimo bukhila esahabu.

¹⁵Bukesi buli ne bukhala khukhila kamamili ke bukusi bwe angaaki, ne mbao siosi siosi nisio wenya sinyala sialekhanisibwa ne nabwo tawe.

¹⁶Buyindifu buli mu mukhono kwabwo kumuseecha, ne mu mukhono kwabwo kumukhasi mulimo buiinda ne lukoosi.

¹⁷Chingila chabwo chili che lisiimisia, ne chingila chabwo choosi chili che kumuleembe.

¹⁸Buli kumurongooro kwe bulamu khwaabo babubukula, abo babuaamba ne kamaani balaangwa be ekhabi.

¹⁹Wele Omunyali Owa Bioosi abaang'ana sibala khubirira khu bukesi, khulwe limanya arao likulu,

²⁰khubirira khu limanya liewe chinjichi charundukha, ne kamafuumbi kekhola efula.

²¹Mwana wase liinda bukesi bulayi ne enganakani endayi, bikhakhola birio biakhururakho tawe.

²²Ne bilaba bulamu khulwe kumwoyo kwowo, ne buroni mwikosi mwowo.

²³Nio olikeenda khu ngila mu muleembe, ne sikele siowo se siliituya tawe.

²⁴Ne wikhala asi se oliembeelela tawe, nga nokona asi liilo liowo liliba lilayi.

²⁵Okheembeelela butinyu bwa matundubiikha, namwe khubuna khwe butinyu ne khwicha tawe,

²⁶sikila Wele Omunyali Owa Bioosi alaba lilieyikina liowo, ne alikhuliinda khukhwama mu mireko.

²⁷Okhalekha khukhola bulayi khwaabo babenyekhana obakholele tawe, liaba ne lili mu bunyali bwowo khola orio.

²⁸Okhaboolela chirani wowo oli, “Cha, okobole, namwe muchuli khakhuelesie” noli nende sie khumuelesia tawe.

²⁹Okharekekhera kamabi owasio, owakhweyikina tawe.

³⁰Okhayingana no omundu yesi yesi nokhali ne sifuno, aaba nakhakhukholeele libi tawe.

³¹Okhakhendekhela omundu okhola sisiayuumba tawe, lundi okharobora chingila chewe tawe,

³²sikila omundu owe sifwaabi ali osinyisia Wele Omunyali Owa Bioosi, ne kakhali baluungi bali mu bwiyikinwa bwewe.

³³Silaamo sia Wele Omunyali Owa Bioosi sili khunju eye bamayaanu, ne kakhali abiita chikhabi khunju eye babaandu ba ng'ali.

³⁴ Khwaabo bamulekelesia, abalekelesia, ne kakhali akholela kamalayi abo babeboombia,

³⁵bakesi balinyoola kumukabwa kwe lukoosi, ne kakhali basilu balinyoola chisoni.