Read lubukusu Chis. 30 Bible Online

Chis. 30 - lubukusu bible

Chis. 30

¹Kano kali kamakhuwa ka Akuri okhwa Yake owa Masa. Kamakhuwa kano akaboolela Itieli, yee, khu Itieli ne Ukali aloma ali,

²“Ng'ali ese ndi omundu omusilu lukali, se ndi ne limanya lio mundu tawe.

³Se neyikile bukesi namwe khuba ne limanya lia Wele omutakatifu tawe.

⁴Naanu owaniinakho mwikulu mala ekha asi? Naanu owabuusia embeo mu fuusi mweewe? Naanu owaboa kameechi mu ngubo yewe? Naanu owarao chinjakha choosi che sibala? Lisina liewe naanu, ne lisina lio mwana wewe bali naanu? Ng'ali ewe omanyile!

⁵“Buli likhuwa lia Wele lili lia ng'ali, Wele ali engabo khwaabo bamwilukhilakho.

⁶Okhatasakho khu makhuwa kewe tawe, akhola ario akhurafwira mala wanyolekhana khuba omubeeyi.”

⁷Khusaba bibiindu bibili khukhwama khwiwe, okhanyuma bibiindu bino ne khafwa tawe:

⁸Ndusiekho bukarangarani ne bubeeyi, okhamba buiinda namwe butaambi tawe, ndiisie ne siakhulia sisinjola,

⁹busa khola ndio nekura mala nakhwikaana, naloma ndi, “Wele Omunyali Owa Bioosi niye naanu?” Namwe khola ndio naba omutaambi mala neeba, mala nafwochola lisina lia Wele wase.

¹⁰Okhachonganila omukholi khu mwami wewe tawe, akhola ario akhulaama mala wanyolekhana ne kumusaango.

¹¹Baliio abo balaama baraarawabwe, mala se basabila ba maawabwe chikhabi tawe.

¹²Baliio babebaasia bali bali bakwalaafu mu moni chabwe babeene, ne se bekwalaasia khukhwama khu bubi bwabwe tawe.

¹³Baliio abo bali ne lilielola, ne lilola lie khukhwibonia.

¹⁴Baliio abo nibo kameeno kabwe kali chimbalu, lundi kimibano, khukhwira bataambi barure mu sibala, ne babanani barure mu baandu.

¹⁵Namukhuni ali ne bakhaana bewe babili balila bali, “Mbe! Mbe!” Bibiindu bitaru bikhanyalikha tawe, bine bikhaliloma bili, “Khwanyalikhe tawe.”

¹⁶Ekoombe, omukuumba, liloba likhanyoola kameechi kaliola tawe, ne kumulilo kukheekaana kuli, “Nanyalikhe ndio tawe.”

¹⁷Omundu okhoma raraawe ne khufwochola maawe, khooro be mwitooma balisoonya chimoni chewe, mala chingoosia chibalie.

¹⁸Bibiindu bitaru bili bie liukia khwise, bine nibio ekhamanya tawe,

¹⁹Engila eye Furuusi mu ngaaki, engila eye ndemu khu lwanda, engila eye meeli akari khu nyanja, ne engila yo mundu ne asiimana no mukhaana.

²⁰Eyino niyo engila yo mukhasi omueeyi, alia ne eeya emunwa, mala aloma ali, “Se nakholile libi tawe.”

²¹Biliio bibiindu bitaru biteremia sibala, ne asi wa bine liloba se likhaliilikha tawe.

²²Nasioobi ne aba omwami, omusilu ne ali ne biakhulia bikali,

²³omukhasi omubi ne acha munju, ne omukhaana omukholi ne acha khu museecha owo mukhasi niye akholela.

²⁴Bibiindu biliio bine khu sibala biili bikeekhe, ne kakhali bili bikesi lukali,

²⁵Kamake kali bibiindu biikhali ne kamaani tawe, ne kakhali kabuunga biakhulia biako mu siimiyu.

²⁶Bikoneelwa bili bibiindu bitekhele, ne kakhali biombakha chinju chabio mu lwanda.

²⁷Chisike se chili no mwami tawe, ne kakhali choosi chikeendela mu bipupu.

²⁸Embakilia onyala wakitiila mukhono, ne kakhali chinyoolekhana mu machipi ke babaami.

²⁹Biliio bibiindu bitaru bikeenda bulayi, bine binauusia bulayi,

³⁰etalang'i ekhila chisolo choosi kamaani, ne seria yosi yosi tawe,

³¹etaaywa, endurume, no mwami okeenda ebweeni we babaandu bewe.

³²Waaba ne wabeleenge omusilu ne weniinia, namwe waaba ne warekekhanga kamamayaanu, sila busa.

³³Sikila newisacha kamabeele kamafura kamamo, ne wikuba liliolu kamafuki kamamo, ne winyosia lirima bulomani bwamamo.