Read lubukusu Chis. 31 Bible Online

Chis. 31 - lubukusu bible

Chis. 31

¹Kano kali kamakhuwa ko mwami Lemueli owa Masa. Maayi wewe niye owamuboolela. Amuboolela ali,

²Tawe mwana wase, mwana wase niye nasaala, tawe mwana wase niye nasaba nanyoola,

³Okhamalila kamaani kowo khu bakhasi tawe, kamaani kowo khwaabo babunia babaami tawe.

⁴Babaami se bakhoyele banywa endali tawe, ee Lemueli, babemeelesi se bakhoyele bekoomba kamalwa tawe,

⁵bakhola bario banywa mala bebilila kakabisibwa, mala balekha khukholela bung'ali baali ne butinyu.

⁶Elesia kamalwa kamarafu oyo oolikho ne abuna, ne elesia endali oyo ooli mu butinyu,

⁷lekha banywe mala bebilile kumutaambo kwabwe, lundi balekhe khukhebulila butinyu bwabwe.

⁸Lomalomela abo bakhanyala khulomaloma tawe, khupanila bung'ali bwabo bakhenyala tawe.

⁹Lomaloma mala okhalake mu buluungi, khupanila bung'ali bwe bataambi nende babanani.

¹⁰Naanu onyala aanyoola omukhasi omulayi? Omukhasi ario ali owe bukhala bukali khukhila bwe kamamili.

¹¹Kumwoyo kwo museecha wewe kumwiyikina niye, ne se alilekha khunyoola bukhala tawe.

¹²Akholela omuseecha wewe bulayi, ne se amukholelakho kamabi tawe mu bulamu bwewe bwoosi.

¹³Ayiima bufuumbo bwe likheese ne katani, mala eerusia khunaba,

¹⁴Ali nga chimeeli che baboofuli, asakha biakhulia biewe khukhwama aleeyi.

¹⁵Enyokha silo silo, mala ayiimila be nju yewe biakhulia, ne khukaba bakholi bewe kimilimo.

¹⁶Ayiima kumukuunda mala akukula, ne mu bibiaamo biewe abiaala liruuti lie kimisabibu.

¹⁷Akhola kimilimo ne kamaani, mala alumia mu khuumbo.

¹⁸Abona ali bibiindu biewe bili ne bukhala, Etaa yewe eburukha ne busia.

¹⁹Omwene akhola buusi bwewe, mala anaba chingubo chewe omwene.

²⁰Ali omuaani khu bataambi, ne khu babanani.

²¹Se aria ebarafu khulwe nju yewe tawe, sikila be nju yewe boosi befwara chingubo che luluya.

²²Ekholela omwene bibiebiimbilo, chingubo chewe chili che ngubo eya katani lundi chinapeenda.

²³Omuseecha wewe amanyikhaane mungoba, nga ne ekhala akari we basaakhulu be sibala.

²⁴Anaba chingubo cha katani ne achikusia, akusia kimisiipi khu baboofuli.

²⁵Ali ne kamaani ne lukoosi, aliindilila kakeecha ne busangaafu.

²⁶Alomaloma sikesi mala ekesia ke bulayi, akaambila babasie ke buaani.

²⁷Aliinda bulayi enju yewe, ne se ali omukara tawe.

²⁸Babaana bewe benyokha ne bamulaanga bali owe khabi. Akhaba omuseecha wewe yesi ario mala amufumia ali,

²⁹“Bakhasi bakali bakhola bulayi, ne kakhali ewe obakhila boosi.”

³⁰Lukoondo lubea ne se luli siindu tawe, ne kakhali omukhasi oria Wele Omunyali Owa Bioosi akhoya afumisibwa.

³¹Musiime khulwe kimilimo kiewe, ne lekha bikholwa biewe bimufumie mungoba.