Read lubukusu Chis. 4 Bible Online

Chis. 4 - lubukusu bible

Chis. 4

¹Ulila, baananywe likaambila lie baraarawenywe, ne rekeeresia nio munyoole bukesi,

²sikila muelesia enywe kamekisio kamalayi: mukhalekha niko emwikisia tawe.

³Nga naba omwana omusoleeli, omuteelwa owa paapa ne maayi,

⁴anjekesia ne amboolela ali, “Lekha kumwoyo kwowo kutiile ne kamaani kamakhuwa kase, liinda kamalaka kase nio omenye,

⁵okhebilila namwe okhaukha, khu makhuwa kase tawe. Nyoola bukesi, nyoola limanya.

⁶Okhabulekha tawe, ne bulikhuliinda, busiime, mala bulikhuliinda.

⁷Khurakikha khwe bukesi khuli khuri, nyoola bukesi, ne siosi siosi nisio onyoola, tasakho khunyoola limanya.

⁸Buelesie bukhala lukali ne bulikhuelesia efuma, bulikhuelesia lukoosi waba ne obubukula.

⁹Bulira khu murwe kwowo bimuli bilayi, bulikhuraakho ekutwa endayi.”

¹⁰Ulila, mwana wase mala ofukiilile kamakhuwa kase nio kimiiko kie bulamu bwowo kibe kimikali.

¹¹Nakhwekesie ewe engila eye bukesi, nakhuyilile mungila che buluungi.

¹²Nga ne okeenda se olikhiingililwa tawe, wakhaba notima soliituya tawe.

¹³Khebulila kamekisio, ne okhakebilila tawe, kaliinde, sikila kali bulamu bwowo.

¹⁴Okhengila mungila che bamayaanu tawe, ne okhakeenda mungila che babaandu bamayaanu tawe.

¹⁵Kirurekho okhakichilakho tawe, kilekhe mala oche engila yowo.

¹⁶Sikila se bakona ne bakhakholile kamakhiikha tawe, liilo se libaamba ne bakhaumisie omundu tawe.

¹⁷Sikila bumayaanu buli nga siakhulia siabwe, ne sisiayuumba sili nga endali yabwe eye khunywa.

¹⁸Ne kakhali engila eye baluungi eli nga buwaanga bwe nyanga ne soa, bukhosia ne buchiililila khuwangia khukhwola mwiangilwe.

¹⁹Engila eye bamayaanu eli nga sisiilima sikali, se bamanya betuya khu siindu siina tawe.

²⁰Mwana wase ulila niko ndoma, rekeeresia kamakhuwa kase.

²¹Okhalekha karura mu nganakani chowo tawe, kabiikhe mu mwoyo kwowo.

²²Sikila kali bulamu khuyo okanyoola, ne kamalesi khu mubili kwewe kwoosi.

²³Liinda kumwoyo kwowo khukhila bioosi, sikila kuli esebele eye bulamu.

²⁴Yirusiakho lilomaloma liibi, lundi yirusiakho chilomo chindabarwa.

²⁵Okhanyukanyuka tawe, okhereerera chisoni tawe.

²⁶ Liinda likeenda liowo, nio niko okhola kaliba kamalayi,

²⁷okhacha kumukhono kumuseecha, namwe kumukhasi tawe, rura mu mamayaanu.