Read lubukusu Chis. 5 Bible Online

Chis. 5 - lubukusu bible

Chis. 5

¹Mwana wase rekeeresia bukesi bwase, ulila limanya liase,

²nio obe ne bukesi bulayi, mala kiminwa kiowo kilinde limanya.

³Kiminwa kio omukhasi omueeyi kironya bubuukhi, ne chilomo chewe chimbolu khukhilakho kamafura,

⁴ne kakhali ekhumaliilikha ali omurafu nga chindang'unywe. Lundi nga embalu eyokia chimbeka chombi.

⁵Bikele biewe bicha mu lifwa, khukeenda khwewe khuloonda engila echa emakoombe,

⁶se arekeeresia ke engila eye bulamu tawe, ne atiima mala se amanya tawe.

⁷Nono baananywe, ndekeeresie, mala mukhaukha khukhwama khu makhuwa kase tawe.

⁸Okhaba siimbi ne naye tawe, ne okhacha embi amuliango kwe enju yewe tawe,

⁹nebusa okhola orio waelesia lukoosi lwowo babaandu babaandi, ne bulamu bwowo babaandu bakhalimo siisa tawe,

¹⁰nebusa bareende bayaaya kimiaandu kiowo, mala kamaani kowo kache munju eyo okundi,

¹¹mala ekhumaliilikha khwe limenya liowo olile, nga chinyama ne kumubili kwowo ne bichuuna,

¹²nio ewe oliloma oli, “Siina sisiakila nalekelesia siiukuumo, nio kumwoyo kwase kwalekelesia khubiiywa!

¹³Se narekeeresia babekisia base, namwe nabaulila tawe.

¹⁴Naba nolile khu siise sie khuambwa chisoni, mu libuusiana lie babaandu.”

¹⁵Nywa kameechi khukhwama mu sebele yowo wamwene, kameechi kakeekha khukhwama mu sebele yowo wamwene.

¹⁶Kameechi kowo kakhoya kachukhwa buli abuundu ku? Kakhoya kachukhwa khu ngila che chingoba ku?

¹⁷Kakhoya kaba kakowo weng'ene, se kali ke bakeni ne nawe tawe.

¹⁸Lekha emoni eye esebele yowo ebiitwe chikhabi, ne yikhoyela omukhasi owe buele bwowo,

¹⁹owe lukoondo lulayi lundi osiimisia. Nyalikha ne busiime ne busangaafu bwewe biise bioosi, yekhoyela busiime bwewe buli lwoosi.

²⁰Mwana wase, siina sikila wekhoyele busiime bwo mukhasi omueeyani, siina sikila wikwayile omukhasi owa beene?

²¹Sikila chingila cho mundu chili ebweeni wa Wele Omunyali Owa Bioosi mala Wele Omunyali Owa Bioosi amanyile chingila chewe choosi.

²²Bumayaanu bwo mumayaanu bumureka omwene, ne anyoolwa mu bikholwa bie bumayaanu bwewe.

²³Afwa khulwe khuleka siiukuumo, ne khulwe busilu bwewe bukali atiba.