Read lubukusu Chis. 6 Bible Online

Chis. 6 - lubukusu bible

Chis. 6

¹Mwana wase, ne weaanile khukhwimeelela chirani wowo khulwe likobi liewe, Kaaba bali waanile lisuubisia liowo sikila omundu oyo,

²Aba warekibwe mu bulomalomi bwe kumunwa kwowo. Watiiliilwe ne kamakhuwa kowo wamwene?

³Nono khola ori mwana wase mala wionie, sikila wakwile mu bunyali bwo wasio, cha khangu olilile owasio.

⁴Okhakonakho liilo tawe, namwe bisike biowo bikhafunyikhakho tawe,

⁵yionia nga kicheu khukhwama khu muuayi, lundi nga enyuni khukhwama khu mureko.

⁶Ewe mukara, cha olole kamake, loleelela chingila chako mala obe omukesi.

⁷Se kali no mwimeelesi, omwimeelesi omukhulu namwe omwami tawe.

⁸Ne kakhali karekekha biakhulia biako mu simiyu, ne khubuusia biakhulia biako mwikesa.

⁹Ewe mukara, olakona buleeyi siina ao? Olisiisimukha khukhwama mwilo siise siina?

¹⁰ Liilo litiiti liri, khukona khutiiti khuri, khukhwifumba kamakhono khutiiti khuri khuulukha,

¹¹nio butaambi bulikhwichakho nga omunuuli, ne khutaamba nga omundu owe bulwaani.

¹²Omundu owe sipoli, omundu omumayaanu, akeenda keenda ne chilomo chimbi,

¹³apakilisia bisike biewe ne khutunya bikele, okeselela ne lulwala lwewe,

¹⁴ne kumwoyo kumubi arekekha kamamayaanu, buli lwoosi abiaala bubwaukhani,

¹⁵Khwako butinyu bulimukwakho khangu khu siise sitiiti siri, alifunikha khukhwola mu bweyaangu nibwo akhaona tawe.

¹⁶Biindu biliio sita nibio Wele Omunyali Owa Bioosi abiila, saba biili bisinyisia khu niye.

¹⁷Chimoni che lililola, lulimi lubea, kamakhono kachukha sifuki sie bakhali ne bubi tawe,

¹⁸kumwoyo kurekekha kamamayaanu, bikele biili khangu khutima mu mamayaanu,

¹⁹omuloli orusia buloli bwe bubeeyi, ne omundu obiaala bubwaukhani mu balebe.

²⁰Mwana wase, liinda kamalaka ka raraao, ne okhalekha kamekisio ka maao tawe.

²¹Kare mu mwoyo kwowo buli lwoosi, kaboe mwikosi mwowo.

²²Ne okeenda kalikhurangirira, nokona kalikhuliinda, ne winyokha kalilomaloma ne nawe.

²³Sikila kamalaka kali etaa ne kamekisio kali buwaanga, lirafwira lie siiukuumo lili engila eye limenya,

²⁴khukhuliinda ewe khukhwama khu mukhasi omumayaanu. Khukhwama khu lilomaloma lilayi lio mukhasi omueeyi.

²⁵Okhekoomba lukoondo lwewe tawe, ne okhamulekha akhuoyela chimoni chewe tawe,

²⁶sikila omueeyi anyala akulibwa khulwe kumukaati mulala, ne kakhali erisia omundu oyo omwene.

²⁷Omundu anyala asuta kumulilo khu sifuba siewe, mala chingubo chewe chilekhe khuya ku?

²⁸Namwe omundu anyala akeenda khu manda ke kumulilo, mala bikele biewe bialekha khuya ku?

²⁹Nono kali kario khuyo ocha khukona no mukhasi owa chirani wewe, omundu yesi yesi otiila khu mukhasi oyo alinyoola kumunaanio.

³⁰Babaandu se balekelesianga omwifwi owiiba, khumala enjala yewe tawe.

³¹Ne kakhali aaba ne anyoolekha mu bwifwi, aliruunga khukhwola kamakhabi saba, aliaana buli sisiindu siili munju mwewe.

³²Oyo okhola bueeyi se ali ne nganakani endayi tawe, oyo okhola ario ebunia omwene.

³³Alinyoola kamakoonjo ne khutamba lukoosi, ne chisoni chewe se chiliwao tawe.

³⁴Sikila libuba likhola omundu aba omurafu, ne salilekhakho siindu ne eyacha tawe.

³⁵Se alifukiilila kumuruungo tawe, namwe lirima liewe se liwa akhaba ne aebwa biianwa bikali tawe.