Read lubukusu Chis. 7 Bible Online

Chis. 7 - lubukusu bible

Chis. 7

¹Mwana wase, liinda kamakhuwa kase, mala okhole kamalaka kase kabe ke bukhala khwiwe,

²liinda kamalaka kase mala omenye, liinda kamekisio kase nga noliinda endolelo ye moni yowo,

³Kaboelele khu njala chowo, kaandike mu mwoyo kwowo.

⁴Boolela bukesi oli, “Ewe oli omukooko wase,” ne laanga limanya oli omusaale niye wasiima lukali,

⁵khukhuliinda ewe khukhwama khu mukhasi omueeyi, khukhwama khu makhuwa kamalayi ko mukhasi omueeyi.

⁶Sikila khukhwama munuma mwe nju yase, naloleleele enje,

⁷nabona mu baandu basilu, nabona mu baele, omusoleeli okhali ne enganakani endayi tawe,

⁸alikho abira khu ngila, siimbi a koona we chingila niio omukhasi omueeyi amenyile, ali khu ngila echa wo mukhasi oyo.

⁹Nga enyanga ne soa, ekolooba, mu siise sie siilo ne mu siilima.

¹⁰Ne bona omukhasi oyo amwakaanana, afwarire nga omueeyi, amuchayo ne sifuno.

¹¹Echa ne luyoka ne khutambamo buuri, bikele biewe se bikhalanga engo tawe,

¹²luno ali khungila, lundi ali khu sooko, ne buli a koona we chingila ekhiinilao.

¹³Omukhasi oyo amukwakho ne khu mwikwayila, amuungusa mumoni ne khumuboolela ali,

¹⁴“Nenyekhana khuaana chimbosio, ne luno nakholile niko nechuba,

¹⁵nono luno nechile khukhwakaanana ewe, nakhuyiimile ne kumwoyo kwoosi mala nakhunyoolile.

¹⁶Nalile khu sitanda siase bulili, bulili bwe engubo eye katani khukhwama e Misiri,

¹⁷nareere khu sitaanda siase kamafura kaunya bulayi ka manemane, udi ne mudalasini.

¹⁸Yiicha khusiimane khukhwola kumutikhinyi, lekha khwisangaasie ne busiime.

¹⁹Sikila omuseecha wase se ali engo tawe, achile khu lukeendo luleeyi,

²⁰abukule kumufuko kwe chirupia, akhakobole engo kumwesi ne kuli chelechenje.”

²¹Ne chilomo chingali che khuoya amukhongelesia, ne lilomaloma lilayi amwikoonjelela,

²²khangu busa aloondile khu mukhasi oyo, oli e eeyi ne echa mu sichinjilo, namwe nga omusilu ne atiilwa,

²³khukhwola nga buembo ne bufutula enda yewe, nga enyuni etima khucha khu mureko, omundu yuno se amanyile ali alatibia bulamu bwewe tawe.

²⁴Ne nono, Ee bananywe, ndekeeresie, ne ulila kamakhuwa kase.

²⁵Mukhalekha kimiooyo kienywe, kiacha mungila cho mukhasi oyo tawe, ne mukhekhiikha mwamuloondakho tawe,

²⁶sikila bali bakali nibo abunia, ee, nibo eera bali lituuli.

²⁷Enju yewe eli engila eye khucha mu lifwa, eli kumuyila kucha ekoombe.