Read lubukusu Chis. 8 Bible Online

Chis. 8 - lubukusu bible

Chis. 8

¹ Bukesi se bulikho bulaanga, ne limanya se lilikho liyokela ku?

²Khu bikulu angaaki ne ngila, ne bwemile khu chingila,

³Embi a bilibwa ebweeni we lukoba, abwingililo, bukesi bulikho bulangilila,

⁴“Khwinywe ee baandu, ndikho ndaanga, ne lilaanga liase lili khu buli mundu.

⁵Ee basilu enywe, yeyika limanya, Ee basilu, rekeeresia.

⁶Ulila, sikila ndaloma kamalayi, khukhwama mukhanwa mwase kalamamo kaali kamaluungi.

⁷Sikila kumunwa kwase kulaloma bung'ali, bumayaanu buli lisinya khwise.

⁸Kamakhuwa koosi niko ndoma kali kamaluungi, mbamo elomo emayaanu namwe eye kitiimo mu makhuwa kase tawe.

⁹Koosi kali kamakololofu khuyo oulila, ne kali kamaluungi khuyo onyoola limanya.

¹⁰Robora kamekisio kase khukhila efwesa, ne limanya khukhila esahabu endayi,

¹¹“Sikila bukesi bukhila kamamili, ne bioosi nibio wikoomba se binyala bialekhaanisibwa nabwo tawe.

¹²Ese bukesi, ndi ne liiulila, ndi ne limanya ne bukhalaki bulayi.

¹³Khuria Wele Omunyali Owa Bioosi nikhwo khubiila kamamayaanu, lilielola, sileka, ne chingila chimayaanu, akhaba ne lilomaloma lie kitiimo, nabibiila.

¹⁴Ndi ne likeleka ne bukesi bulayi, endi ne limanya ne kamaani.

¹⁵Njeeta babaami khukhwamiia, ne babemeelesi khubisia kamalaka kang'ali,

¹⁶Babemeelesi bandumikhira khukhwamiia, ne bakoosi bemeelela sibala.

¹⁷Siima abo babasiima, ne abo babambiima ne kamaani banyoola.

¹⁸Buyiinda ne lukoosi bili ne nase, akhaba kimiaandu kikhawa tawe ne liindiala bili nase.

¹⁹Bibiaamo biase bikhila esahabu, akhaba esahabu endayi, ne khukhwaama khwase khukhila efwesa endayi.

²⁰Ngende khu ngila eye buluungi, lundi eya ng'ali,

²¹Mbaana kimiaandu khwaabo babasiima, ne khukhwichusia kamabiikhilo kabwe.

²² “Wele Omunyali Owa Bioosi ambuumba mu lirakikha lie kimilimo kiewe, naaba owe khunyoa owe kimilimo kiewe kie khaale.

²³Narerwao mu miiko kie khaale, mu khunyoa, sibala ne siikhabao tawe.

²⁴Chinyanja ne chikhabao tawe, nasaalwa, chinjichi ne chikhabamo kameechi kamakali tawe.

²⁵Chingulu ne chikhakholwa tawe, bikulu ne bikhabao tawe, nasaalwa,

²⁶Wele Omunyali Owa Bioosi ne asiili khukhola liloba ne kimikuunda kialio, namwe lipukhuulu lie khunyoa khu sibala.

²⁷Nga akhola likulu, nabao, nga akhola engara khu nyanja,

²⁸nga ne ara kamafuumbi khwikulu, nga ne akhola kumusiingi kwe chinyanja,

²⁹nga arao chinjakha che enyanja, nio kameechi kalekhe khutuuma lilaka lia Wele Omunyali Owa Bioosi, nga arao kimisiingi kie sibala,

³⁰nabaao nga omukholi omusicha, naba esangaalo yewe, Ne nikhoya ebweeni wewe buli lwoosi.

³¹Nikhoya mu sibala siewe simenywamo, ne khusangaalila babaandu.

³²“Nono baana base mbulile, bali ne khabi abo batiila kamalaka kase.

³³Ulila kamekisio mala mube bakesi, ne mukhakalekha tawe.

³⁴Ali ne khabi omundu oundekeeresia, lundi olindiililanga buli lwoosi a silibwa siase. Ne noyo olindiililanga a muliango kwase.

³⁵Sikila omundu ounyoola ese aba anyoolile bulamu lundi anyoola kumwalaalo kwa Wele Omunyali Owa Bioosi,

³⁶ne kakhali omundu okhanyoola tawe eumisia omwene, boosi babambiila basiima lifwa.”