Read lubukusu Omwil. 1 Bible Online

Omwil. 1 - lubukusu bible

Omwil. 1

¹Kano kali kamakhuwa ko mwilwachi owaba okhwa Daudi. Omwilwachi yuno aba omwami mu Yerusalemu.

²Omwilwachi aloma ali, mbamo bukhala tawe, mbamo bukhala tawe, buli siindu se silimo bukhala tawe.

³Omundu anyoola bukhala siina, mu milimo kiewe kioosi asi we nyanga?

⁴Eselukho ebira, ekiindi yiicha, ne kakhali sibala siliio buli lwoosi.

⁵Enyanga erura, lundi enyanga ekwa, ekobolanga lundi niio erurira.

⁶Ekhuungu euucha ne elola ebunafubo, lundi ekobola ebunaswa, ne ebotookhelela ne ebotookhelela lundi, mala ekobole niio yamile.

⁷Chinjichi choosi chichukha mu nyanja, ne enyanja se yiichula tawe, kameechi kakobola niio chinjichi chakukha, mala chichiililila khuchukhamo lundi.

⁸Buli siindu sireera siluo, siluo sikali nisio omundu akhanyala aboola nga ne sili tawe, emoni se elua khubona tawe, ne liiru se lilua khuulila tawe.

⁹Kakabao khale niko kalibao lundi, kakekholeekhe niko kaliekholekha, ne se siliio sisiindu sikeni asi we enyanga tawe.

¹⁰Siliio sisiindu nisio baloma bali, “Lola, sino sili siiya ku?” Siamala khubao, mu biise bikhale ne khukhasaalwa tawe.

¹¹Mbao okhebulila bibiindu bikhale tawe, namwe se lilibao likhebulila lie bibiindu biliekholekha, mwabo bakheeche enyuma tawe.

¹²Ese, omwilwachi nabeele omwami owa Isiraeli ne ndi mu Yerusalemu.

¹³Narumikhira kamebaasio kase ne limanya khuyiima ne khuenja bioosi bibiekholekha asi we nyanga. Sili sisiindu sie kumunaanio kumukali nisio Wele amala khuelesia babaana be babaandu khuba ne nasio.

¹⁴Namalile khubona buli sisiindu sisiekholekha asi we nyanga, ne lola, bioosi se bilimo bukhala tawe. Bili nga ne otimania embeo.

¹⁵Sisiefumbaka se sinyala siakololwa tawe, ne siitaambao se sinyala siabalwa tawe.

¹⁶ Naloma ndi, “Nanyoola bukesi bukali, khukhila boosi babandaangirira mu Yerusalemu, nanyoolile bukesi ne limanya.”

¹⁷Narumikhira kumurwe kwase khuyiima khumanya bukesi, kamalalu ne busilu. Namanya ndi kano koosi kali busa nga ne otimania embeo.

¹⁸Sikila khuba ne bukesi bukali oba ne linaanisibwa likali, ne oyo otasa limanya likali atasa libeelela likali.