Read lubukusu Omwil. 10 Bible Online

Omwil. 10 - lubukusu bible

Omwil. 10

¹Chiisi chifu chinyala chafuundia kamafura, nono busilu bukeekhe buri bwonakaka bukesi ne lukoosi.

²Omundu omukesi akhola kaali kamalayi, ne kakhali omusilu akhola kaali kamabi.

³Akhaba omusilu ne alikho akeenda khu ngila ataamba limanya, ne ekesia buli mundu ali, ali omusilu.

⁴Kaaba bali omwami akhurafuakila mu lirima, okhalekha khangu kimilimo nikio okhola tawe, khukhwiboombia khukila kamabi karusibwao.

⁵Buliio bumayaanu nibwo malile khubona asi we nyanga, bureerwa ne babaami.

⁶Babaandu basilu baebwanga bubweyaangu bwe bunyali bwe angaaki ne babaandu baiinda babalangulakho busa.

⁷Namalile khubona banasioobi ne baniinile khu farasi ne babaami bakeenda nga banasioobi.

⁸ Olima liloo alalikwamo, Ne otechulaka lisiisi, endemu elamuluma.

⁹Oyo owaara kamabaale alaumisibwa ne nako, ne oyo owasaaka bichikhi ali mu busiku.

¹⁰Sichuuma siaaba ne sili sifuu mala balekha khusiakala, osirumikhira akhoya arumikhira kamaani kamakali, ne kakhali bukesi bumuyeeta akhila.

¹¹Endemu yaaba ne luma ne bakhakisakania tawe, aba okisaakania se enyibwa lundi tawe.

¹²Lilomaloma lio mundu omukesi lili lie kumwalaalo, ne kakhali lilomaloma lio musilu limwiira omwene.

¹³Lirakikha lie khulomaloma khwewe lili busilu, ne khumaliilikha khwewe khuli kamalalu.

¹⁴Omusilu aloma ne elamo, akhaba omundu ne akhamanyile kakeecha khubao tawe, ne naanu onyala akhuboolela kaliekholekha enyuma we lifwa?

¹⁵Kimilimo kio musilu kimuluya, nio alekhe khumanya engila echa engo tawe.

¹⁶Butinyu bwamunyoola ee baandu be sibala, omwami wenywe nasiili omwana, ne babaami ne bakhola naikara kumutikhinyi.

¹⁷Muli ne khabi, Ee baandu be sibala, omwami wenywe ne ali owe lukoosi, ne babaami bakhola naikara biise bibienyekha, khulwe kamaani, ne se khuli khulwe bumeesi tawe.

¹⁸Liliefuufula likila enju yasulula, ne bukara bukila silama siabwaama mu kari.

¹⁹Naikara ekholwa khulwe chinjekho, ne endali ekhusangaasia, ne chirupia chikula buli sisiindu.

²⁰Okhalaama omwami, akhaba mu mebaasio kowo tawe, namwe okhalaamila omuiinda mu lusiro lwowo tawe, sikila enyuni enyala yasuta kumumilo kwowo, namwe sibuumbe sisiindi sie chindaa sinyala siakhubuula.