Read lubukusu Omwil. 12 Bible Online

Omwil. 12 - lubukusu bible

Omwil. 12

¹Khebulila Omubuumbi wowo mu ndaalo che buele bwowo, chindaalo chimbi ne chisiili khwola tawe, ne kimiiko ne kikhembiya tawe. Mu miiko ekio oliloma oli, “Ese se ndi ne busangaafu mu menako tawe.”

²Biise ebio nibio enyanga ne buwaanga ne kumwesi, ne ching'enieesi bikhamaliyilekho, ne kamafuumbi kakhakobole enyuma we fula.

³Mu ndaalo echo, baliindi be chinju bakhatereme, babaandu be kamaani baliinamikha, ne bakhasi basia mureko balilekha sikila bali batiiti. Abo balolela mu matirisia balibona sisiilimalima.

⁴Siise nisio kimiliango kie kamaru kowo kikhabe kiekaalwe, ne khuuliilikha khwe chireko se khukhabe khukali tawe. Ne kakhali mu silo omundu akhenyokhe akhaba khulwe luyoka lwe nyuni ne yiimba.

⁵Oliria khuniina bikiingi, olilola khuba busiro khucha lukeendo. Lichuune liowo liliwangia khumurwe nga bimuli bie kumurongooro kwa alimondi. Olikeenda ne oyikila nga liteete ne se oliba ne liliekoomba tawe. Ne oliloota mungo mwowo mwa mindali na mindali. Ne babaandu baliicha kamasika kowo.

⁶Siise esio lusia lwe esahabu lukhakhalikhe epwakuli eye esahabu ekhatikhe, enyuungu ekhatikhile mu sebele, ne mu ngila eyo ne ng'ene kumukuu kwe khukhwesa kameechi kukhakhalikhe.

⁷Ne liloba lilikobola khu liloba nga nilwo liaba, ne roho elikobola khu Wele owakibuumba.

⁸Omwilwachi aloma ali, bukhala mbamo, bukhala mbamo. Bioosi bukhala mbamo.

⁹Ne khurusiakho omwilwachi khuuba owe limanya, ekisia babaandu bukesi. Aapiima chisimo chingali, acheyika ne khuchingoona bulayi.

¹⁰Omwilwachi akhaka khuyiima kamakhuwa ke khusiimisia, aandika mu busicha kamakhuwa ke bung'ali.

¹¹Lilomaloma lie babaandu bakesi lili nga esiimbo eye khukhwayila, ne chisimo chichabuusibwa chili nga chimenya nga kimisumari kikiakhomwa kialuma, chichaama khu Wele, Omwaayi mulala owefwe fwesi.

¹²Mwana wase, khukhila koosi, yiiyaya! Khuandika bitabu se khuli ne sisiakamo tawe, ne khusoma khukali khuluya kumubili.

¹³Enyuma wa kano koosi, siliio sisiindu silala poli nisio ndoma sili sino: Ria Wele, mala otiile kamalaka kewe, sikila omundu abuumbwa khulwe bibieene ebio.

¹⁴Sikila Wele acha khukhalakila buli sisiindu nisio khukhola, sibeele silayi namwe sibi, akhaba bibiindu bibiikholekhela mu bwikisi.