Read lubukusu Omwil. 2 Bible Online

Omwil. 2 - lubukusu bible

Omwil. 2

¹Nio ese naloma ndi, “Khe nje mu bukoote, nisangaasiekho.” Ne kakhali nanyoola ndi bino bioosi se bilimo bukhala bwosi bwosi tawe.

²Ese naloma ndi “Chinjekho chili kamalalu ne esangaalo elimo nabukhala siina?”

³Nebaasia khukhwesangaasia samwene khulwe ndali ne siili ne bukesi. Nakhalaka khuba omusilu nio emanye chingila chindayi nga babaandu ne bamenyile mu sibala khu ndaalo ndiiti.

⁴ Nakhola kimilimo kimikali. Nombakha chinju mala nabiaala kimisabibu mu mikuunda kiase.

⁵Samwene nebiaalila kamaruuti lundi nang'oona ne abuundu e khuolela mala nabiaalao buli murongooro kwe kamatuunda.

⁶Samwene nekholela kamatiisi niko namiamo kameechi ke khuchukhilila kumusiru kwe khukhusia kimirongooro.

⁷ Nakula banasioobi be siseecha nende be siikhasi, lundi naba ne banasioobi babasaalwa munju yase. Lundi naba ne kamatuuli ke chikhaafu ne bibiaayo, khukhila buli yesi owamenya mu Yerusalemu.

⁸ Lundi nabuusia efwesa ne sahabu khukhwama mwibiikhilo lie bubwami ne khukhwama mu ngoongo nicho namiia. Babaandu be siseecha nende be siikhasi bemba ne banjakaanila, mala naba ne bakhasi bakali nibo namenyia busa nga basaale, babasiimisianga.

⁹ Nio nakhila boosi babaanyoa ebweeni wase mu Yerusalemu. Narama ndio ne bukesi bwase.

¹⁰Ne buli sisiindu nisio chimoni chase chabona nasikoomba. Naba se niberera nisio nikoomba tawe. Naba ndio sikila kumwoyo kwase kwasiimisibwa ne kimilimo kiase, ne kuno nikwo kukwaba kumuruuru kwe kimilimo kiase kioosi.

¹¹Nio nebaasia khu koosi niko nakhola, ne butinyu nibwo nanyoola ne ndikho ekhola, ne lola bioosi se biabamo bukhala tawe, biaba busa nga otimania embeo, mala mbao siosi siosi nisio onyoolamo asi we nyanga tawe.

¹²Nio nakanakana khu bukhala bwe bukesi, kamalalu ne busilu. Omundu onyala amiia enyuma wo mwami anyala akhola siina? Ne kakhali liliakholwa liong'ene.

¹³Nio namanya ndi bukesi bukhila busilu, nga buwaanga ne bukhila sisiilima.

¹⁴Omundu omukesi abona niio alikho acha, ne omusilu akeendela mu siilima. Kakhaba kario, namanya ndi omundu owe limanya no musilu khutabusia khwabwe khuli busa khufwaanane.

¹⁵Nio naloma ndi, “Sisiekholekha khu musilu silinjekholekhakho seesi. Nio sikila siina neemba omukesi lukali?” Mala naloma ndi khuba omukesi se khuli ne bukhala tawe.

¹⁶Sikila mbao likhebulila lia mindali na mindali lio mukesi, namwe lio musilu tawe. Sikila chindaalo chichiicha boombi alala balibililwa. Omukesi afwa busa nga omusilu!

¹⁷Nio nabiila bulamu, sikila bwakila nebaasia ndi buli sisiindu sisiekholekha asi we enyanga siambumisia ese. Sikila bioosi bukhala mbamo sili nga notimania embeo.

¹⁸Nabiila kimilimo kiase kioosi nikio nakhola asi we nyanga. Khubona ndi omundu okundi busa alikiilakho.

¹⁹Ne naanu omanya omundu oyo ne aliba omundu omukesi namwe omusilu? Kakhaba kario, akheele khu matuunda ke kimilimo kiase ne bukesi bwase asi we nyanga. Bino bioosi bukhala mbamo.

²⁰Nio nebaasia mala narusiakho kumwoyo khu milimo kiase nikio nakhola asi we enyanga.

²¹Sikila siise silala omundu akhola sisiindu ne kamaani, arumikhira bukesi bwewe bwoosi, limanya, ne busicha, mala afwe asilekhele sioosi omundu okundi asangaalilekho okhaasikholakho tawe. Kano koosi bukhala mbamo, buno buli bumayaanu bukali!

²²Omundu anyoola siina mu milimo kioosi nikio akhola naluilakho asi we enyanga?

²³ Chindaalo che bulamu bwo omundu choosi chili che buchuuni ne bubeeleli. Akhaba mu silo se aulukhanga chinganakani tawe. Kano koosi bukhala mbamo.

²⁴ Mbao sisiindu silayi siikhila omundu khulia ne khunywa, ne khukhwikhoyela kumulimo kwewe tawe. Lino liosi, nalibona ndi liama khu Wele.

²⁵Sikila naanu onyala aalia namwe asangaala nakhali ne Wele tawe?

²⁶ Sikila Wele aelesia limanya, bukesi ne busangaafu khu mundu omusiimisia. Ne aelesia omumayaanu kumulimo kwe khukhwangala ne khubuunga kimiaandu nikio alielesia oyo niye Wele asiimisibwa ne naye. Kano koosi bukhala mbamo lundi kali nga notimania embeo.