Read lubukusu Omwil. 3 Bible Online

Omwil. 3 - lubukusu bible

Omwil. 3

¹Buli sisiindu sisiekholekha asi we nyanga sili ne siise siasio:

²siise sie khusaalwa, ne siise sie khufwa, siise sie khumiicha, ne siise sie khukesa,

³siise sie khukhwiira, ne siise sie khuonia, siise sie khutechulaka, ne siise sie khukhwombakha,

⁴siise sie khulila, ne siise sie khuchekha, siise sie khusooma, ne siise sie khukhina,

⁵siise sie khumwaata kamabaale, ne siise sie khubuusia kamabaale alala, siise sie khukhwikwayila, ne siise sie khulekha khukhwikwayila,

⁶siise sie khuyiima, ne siise sie khutibia, siise sie khubiikha, ne siise sie khumwaata,

⁷siise sie khutabula, ne siise sie khunaba, siise sie khusila, ne siise sie khulomaloma,

⁸siise sie khusiima, ne siise sie khubiila, siise sie liie, ne siise sie kumuleembe.

⁹Bukhala siina nibwo omukholi anyoola mu nikio akhola?

¹⁰Naboone niko Wele aelesia babaandu khukhola.

¹¹Akhola buli sisiindu sibe sie lukoondo lulayi mu siise siasio. Lundi aelesia omundu liliekoomba lie khumanya kakheeche, ne kakhali Wele se aamunyalila khumanya bikholwa bia Wele khukhwama mu khurakikha khukhwola mu khumaliilikha tawe.

¹²Manyile ndi mbao siilayi khu nibo tawe, ne khukhali khukhwisangaasia ne khukhwikhoya babene ne basiili balamu.

¹³Buli mundu enyekha alie, anywe, mala ekhoyele mu milimo nikio akhola, sikila sino sili siianwa sia Wele khu mundu.

¹⁴Manyile ndi buli siindu nisio Wele akhola silabao khulwa mindali na mindali. Se siliio sinyala siatasibwakho namwe siarusibwakho tawe. Wele akhola ario nio babaandu bamurie.

¹⁵Buli sisiekholekha, siekholekhakho khale. Wele akhola bibiindu bino ne elelamo.

¹⁶Mu khutasakho, naboone ndi mu sibala niio bung'ali bwenyekha onyoolao bukhali bung'ali tawe, ne abuundu niio buluungi bwenyekha lundi bukhiikha buliio.

¹⁷Naloma mu mwoyo kwase ndi, “Wele acha khukhalakila baluungi ne bamayaanu sitube, sikila Wele akhola buli sisiindu siikholekha mu siise siasio sisiene.”[1]

¹⁸Naloma mu mwoyo kwase ndi, Wele alikho akhukhaka efwe, khukhwekesia ali se khuli balayi khukhila chisaang'i tawe.

¹⁹Sikila butinyu bwo omundu ne bwe chisaang'i bulekhaana. Omundu afwa busa nga esaang'i. Biombi bili ne kumuuya kumufwaanane, ne omundu se alikho nende nisio akhilila chisaang'i tawe. Sikila bioosi se bili ne bukhala tawe.

²⁰Bioosi bilicha abuundu alala. Bioosi biama khwiloba bilikobola khwiloba.

²¹Naanu onyala amanya kumwoyo kwo mundu ne kufwa ne kucha mwikulu, ne kumwoyo kwe saang'i, ne kwiikha asi mwiloba?

²²Nono nabona ndi mbao silayi nisio omundu akhoyeele ekhoyela khukhila kumulimo kwewe tawe, sikila okwo kuli kumukabwa kwewe. Naanu olimukobosia abone siicha khwikholekha enyuma we khufwa khwewe?