Read lubukusu Omwil. 4 Bible Online

Omwil. 4 - lubukusu bible

Omwil. 4

¹Lundi nabona bukuluumi bwoosi bubwekholekha asi we nyanga. Lundi lola, nabona kamasika ke babaandu bakuluumisibwa, mala se abao obaoleelesia tawe. Ba baabakuluumianga baba ne bunyali khu nibo, ne kakhali se baaba nende baabaoleelesia tawe.

²Mala nebaasia ndi babaafwa bali bulayi khukhila balamu basiimenya.

³Ne lukali khukhila okhila balamu ne bafu ali oyo okhasaalwa tawe. Okhaabonakho bikholwa bimayaanu bibiikholekha asi we nyanga tawe.

⁴Lundi nabona sikila babaandu ne bakholanga kimilimo kimikali. Kali kario sikila baali ne siikhalikhali khu basiaabwe. Kano koosi bukhala mbamo lundi khuli busa nga khutimania embeo.

⁵Omusilu se akhola kimilimo tawe, mala omwene eyira khulwe enjala.

⁶Nabulayi khuba na sitiiti sie kumuleembe khukhila khunyoola bikali bie kimilimo kimikali khuli nga khutimania embeo.

⁷Lundi, nabona biikhali ne bukhala asi we nyanga tawe.

⁸Omundu oli busa yeng'ene okhalikho namwana namwe wandaaye tawe, ne kakhaba kario se alekha khukhola kimilimo kiewe buli lwoosi tawe, se anyalikha ne kimiaandu nikio ali ne nakio tawe. Nono khwako se ereeba ali, “Ekholela naanu ne neyimana samwene busangaafu?” Bino bioosi se bilimo bukhala tawe lundi butinyu bukali.

⁹Nabulayi khuba babili khukhila mulala, sikila babili bali ne kumuruuru kumulayi khulwe kimilimo kiabwe.

¹⁰Sikila mulala khu nibo aaba ne akwa, okundi amwinyosia. Ne butinyu bulinyoola oyo oli yeng'ene sikila ne akwa, se ali nokundi omwinyosia tawe.

¹¹Lundi, babili ne bakona alala, baba ne luluuya. Ne mulala yeng'ene anyoola luluuya ariena?

¹²Babaandu babili banyala bakhiingilila busiku bunyala abeele bwakhilwa ne omundu mulala. Kumukoye kukwokusibwa bukoko butaru kuli kumuandalafu khukukitula.

¹³Nabulayi, omusoleeli omuele omutaambi mala oli omukesi, khukhila omwami omusaakhulu mala oli omusilu, okhanyala afukiilila likaambila tawe.

¹⁴Akhaba ne ama mu siboe khucha khu ndebe eye bubwami, namwe ne asaalwa omutaambi ne luno ali omwami.

¹⁵Nabona babaandu boosi bamenyile khu sibala, nabona akhaba omusoleeli owenyekha amiie mu bweyaangu bwo mwami.

¹⁶Se siabao sisiakamo sie babaandu boosi tawe. Abamiia bosi. Kakhaba kario abo bakheeche enyuma wewe, se balimwekhoyela tawe. Ng'ali bino bioosi bukhala mbamo lundi bili nga khutimania embeo.