Read lubukusu Omwil. 5 Bible Online

Omwil. 5 - lubukusu bible

Omwil. 5

¹Wiilinde ne olikho ocha munju mwa Wele. Buli bulayi khuchamo ne khurekeeresia khukhila khurusia embosio nga eye basilu. Babaandu basilu bali bakhamanyile bali balikho bakhola bumayaanu tawe.

²Nyoa wibaasie ne okhalomaloma tawe, ne okhaba khangu mu khusuubisia liosi liosi khu Wele tawe. Niye ali mwikulu, ne ewe oli khu sibala, khwako lekha kamakhuwa kowo kabe matiiti.

³Sikila kamarooro keecha khulwe kimilimo kimikali, ne kumumilo kwo musilu khulwe kamakhuwa kamakali.

⁴ Ne osuubisia Wele, okhaayilila khuruunga tawe, sikila se asiimisibwa ne basilu tawe. Ruunga nisio osuubisia.

⁵Nabulayi olekhe khusuubisia khukhila osuubisie mala okhilwe khuruunga.

⁶Okhafukiilila kamakhuwa kowo kakhuyila mu bumayaanu tawe, ne okhaboolela omurumwa owa Wele oli se wang'alilamo tawe. Siina sikila nokhola Wele akhukhalalile? Mala onake nibio wakhola?

⁷Sikila kamarooro ne kali kamakali, kamakhuwa ka busa katasikha, ne kakhali ewe ria Wele.

⁸Ne obona mu sibala bataambi ne bamiinibwa mala bung'ali ne buluungi se biliio tawe okhesiindukha tawe. Sikila ooli angaaki alolelelwa nende ooli angaakikho, ne baliio be angaaki lukali.

⁹Ne kakhali mu koosi, omwami anyoola bukhala bwe kamaloba ke biluundu.

¹⁰Oyo osiima chirupia, se anyalikha nacho tawe, namwe oyo osiima buiinda se anyalikha nabwo tawe. Bino bioosi se bilimo bukhala tawe.

¹¹Kimiaandu ne kikucha, bakilia boosi bakucha, ne bukhala siina nibwo omwenekio ali nabwo, ne khukhali khukilolakho busa?

¹²Omukholi akona liilo likali akhaba ne alia bitiiti namwe bikali. Omuyiinda, aakhalia ekura se akona liilo tawe.

¹³Buliio bumayaanu bubi lukali nibwo namala khubona asi we nyanga. Omundu abiikha kimiaandu kimuumisia omwene.

¹⁴Ne kimiaandu ekio kiatiba sikila ekhabi embi. Ne omundu oyo a ba no mwana ne se ali ne sisiindu tawe.

¹⁵Nga omundu ne ama munda mwa maawe ne ali sichula, bulayi bwene nga nilwo alirura mu sibala sichula ne akobola niio ama eyo. Alirura sichula nga ne echa, ne se alisuta siosi siosi sie kimilimo kiewe tawe.

¹⁶Obuno bwosi buli bubi bukali. Nga nilwo asaalwa alifwa ario, ne bukhala siina nibwo anyoola khukhwama mu milimo kiewe,

¹⁷ne khumalila chindaalo chewe choosi mu siilima ne buchuuni,[2] mu khwiembeelela, mu bukhalafu ne bulwaale?

¹⁸Lola, nilio malile khubona lili lilayi lundi likhoyela lili khulia ne khunywa ne khukhwekhoyela kimilimo kioosi nikio omundu akhola asi we nyanga mu ndaalo chindiiti nicho Wele amuelesia, sikila okuno kuli kumukabwa kwewe.

¹⁹Buli mundu yesi niye Wele aelesia kimiaandu ne buiinda ne kamaani ke khukirumikhira, ne khufukiilila kumukabwa kwewe ne khukhwekhoyela kimilimo kiewe. Sino sili siianwa sia Wele.

²⁰Se alikhebulila khuwao khwe chindaalo chewe tawe. Sikila Wele alamuliinda ne khumukhola ekhoye buli lwoosi.