Read lubukusu Omwil. 6 Bible Online

Omwil. 6 - lubukusu bible

Omwil. 6

¹Buliio bumayaanu nibwo malile khubona asi we nyanga, mala bwakonela lukali babaandu.

²Wele anyala aelesia omundu kimiaandu, buiinda, ne lukoosi, nio alekhe khutaamba siosi siosi nisio ekoomba tawe. Ne kakhaba kario, Wele se amuelesia kamaani ke khubilia tawe, ne akhali omukwa niye okilia. Elio bukhala mbamo mala lili nga likoonjo lichuuna.

³Omundu aaba ne asaala babaana emia ndala, mala ayindila kimiiko kimikali nio chindaalo che kimiiko kiewe chibe chingali, ne kakhali alekha khunyalikha tawe mala lundi alekha khusiikhwa bulayi tawe, ndoma ndi, omwana omuusibwa amukhila.

⁴Sikila omwana osaalilwe ne ali omufu se anyoolakho bukhala bwosi bwosi mu khusaalwa tawe. Achiililila busa khuuba mu siilima, mala lisina liewe likisibwa.

⁵Khutasa khwako, omuusibwa se abonakho enyanga namwe amanyakho sisiindu siosi tawe, ne kakhaba kario, anyoola lioola khumukhila niye.

⁶Akhaba abeele niye ne amenya kimiiko chielefu chibili, mala alekha khukisangaalila bulayi tawe, boombi se bacha abuundu alala tawe ku?

⁷Omundu akholela enda, kakhaba kario, kumwoyo kwewe se kunyalikha tawe.

⁸Sikila omukesi anyoola bukhala siina khukhila omusilu? Namwe omutaambi owe kimiima kimilayi anyoola bukhala siina?

⁹Buli bulayi khunyalikha nende nibio khuli nabio khukhila liliekoomba. Kano kosi se kali ne bukhala tawe lili busa nga khutimania embeo.

¹⁰Buli siindu sisiekholekha siamala khale khubisibwa, ne lundi limanyikhaane nga omundu ne ali. Omundu se anyala ayingana ne noyo oli ne bunyali khumukhila niye tawe.

¹¹Kamakhuwa kamakali, bukhala mbamo, nono oyiingana siina?

¹²Ne naanu omanyile kaali kamalayi mu limenya lio mundu ne asiimenya chindaalo chewe chindiiti che bulamu bwa busa, nicho abiramo nga sisiiniini? Naanu onyala aboolela omundu kakheeche khubao nafwiile?