Read lubukusu Omwil. 7 Bible Online

Omwil. 7 - lubukusu bible

Omwil. 7

¹ Lisina lilayi likhila kamafura ke bukusi, ne endaalo eye khufwa ekhila endaalo eye khusaalwa.

²Buli bulayi khucha munju eye kamasika, khukhila khucha munju eya naikara, sikila lino lili liliakamo lie babaandu boosi, ne omulamu ekhebusia ali yesi alifwa.

³Bubeeleli bukhila enjekho, sikila khulwe bubeeleli kumwoyo kusangaala.

⁴Kumwoyo kwo mukesi kuli munju eye kamasika, ne kakhali kumwoyo kwe basilu kuli munju eye sangaalo.

⁵Buli bulayi omundu khuulila likaambila lio mukesi, khukhila kumwenya kwe basilu.

⁶Lichekha lio omusilu, lili nga kumulilo kwe kamawa ne kurundukhaka mu mayika, ako kosi kali ka busa.

⁷Ng'ali limiinikhwa lisilwaasia omundu omukesi, ne asooya ekoyaania kamebaasio.

⁸Litabusia lie sisiindu likhila lirakikha liasio, ne owikhaliilikha akhila oweniinia.

⁹ Okhaba khangu khukhalala tawe, sikila lirima liamenya mu sifuba sie basilu.

¹⁰Okhaloma oli, “Siina sikila chindaalo che khaale ne chaba chindayi khukhila chino?” Sikila se lili lireeba lie bukesi tawe.

¹¹Bukesi buli kumukabwa kumulayi buli bukhala khwaabo bali balamu.

¹²Buliindi bwe bukesi buli nga buliindi bwe chirupia, ne bukhala bwe limanya buli bukesi buloonda bulamu bwo omwenebwo.

¹³Yibaasia kimilimo kia Wele, naanu onyala akololosia sisiindu nisio niye alemasia?

¹⁴Mu ndaalo eye buiinda sangaala, ne mu ndaalo eye butinyu khebulila. Wele akholanga chindaalo chombi echo nio omundu alekhe khumanya siindu siina siosi siicha khwekholekha enyuma tawe[3]

¹⁵Mu bulamu bwase butaamba bukhala, naboone buli sisiindu. Omundu omuluungi anyala afwila mu buluungi bwewe, ne omundu omumayaanu oyindila mu bulamu bwewe mu khukhola bumayaanu.

¹⁶Nono okhaba omuluungi lukali tawe, lundi okhekhola khuba orio tawe, sikila siina wamwene wiyire?

¹⁷Ne okhaba omumayaanu wabiriirira tawe, namwe omusilu tawe sikila siina weyire siise siowo ne sikhoola tawe?

¹⁸Buli bulayi otiile lino, mala okharusiakho kumukhono kwowo tawe, sikila omundu oria Wele alarura mwako koosi.

¹⁹Bukesi buelesia kamaani omundu omukesi khukhila ekookwa eye babaami ekhumi baali mu lukoba.

²⁰Ng'ali mbao omundu omuluungi mu sibala okhola bulayi mala alekha khukhola bumayaanu tawe.

²¹Okhabiikha mu mwoyo kwowo niko babaandu baloma koosi tawe, busa okhola orio waulila omukholi wowo ne akhukhoma,

²²Wamwene omanyile mu mwoyo oli wesi walaama babaandu biise bikali.

²³Kano koosi nakakela khurumikhira bukesi. Naloma ndi, “Ndiba omukesi,” ne kakhali se naba ne bukesi tawe.

²⁴Omundu akhakhole siina khumanya sifuno sie bulamu? Likhuwa lino lilume lundi liaandalafu khwifwe po!

²⁵Ne samwene nakaluukhasia chinganakani chase khumanya ne khuyiima bukesi ne bibiindu khukhwiyiika bumayaanu ne busilu nga buli kamalalu.

²⁶Nanyoola sisiindu siili sie buchuuni khukhila lifwa, omukhasi owe kumwoyo kuli nga kimireko ne chindiimba, lundi owe kamakhono nga kiminyololo. Omundu osiimisia Wele niye omwifubarura, ne omumayaanu asiimisibwa ne omukhasi oyo.

²⁷Omwilwachi aloma ali, lola, ese nabona kano, nga naba ne ndasa sisiindu silala khu siindi nio nyoole bukali bwabio.

²⁸Nayiima ne nililamo ne se nanyoolile tawe, nabona omundu owe siseecha mulala mu baandu eelefu ndala niye nyala naria, ne esiili khunyoola owe siikhasi tawe.

²⁹Lola, nanyoola ndi, Wele abuumba babaandu baluungi, ne babeene bekhochoocha bibiindu bikali.