Read lubukusu Omwil. 8 Bible Online

Omwil. 8 - lubukusu bible

Omwil. 8

¹Naanu oli nga omundu omukesi? Ne naanu omanyile khukaluukhasia elomo? Bukesi bwo omundu bumukhola asangaala, lundi bumukhola alekha khusulunya.

²Khola niko omwami alaka, mala okhaba khangu khukhwechubila Wele tawe.

³Rura niio omwami ali, okhaayilila kamakhuwa ne kakhali kasiimisia tawe, sikila omwami akhola sisiindu siosi siosi nisio enya.

⁴Omwami akhola nga nilwo enya, ne mbao omundu yesi yesi onyala amureeba khu niko akhola tawe.

⁵Oyo oria lilaka se acha khunyoola butinyu tawe, ne chinganakani cho mukesi chimanyile siise ne ngila niyo akholelamo.

⁶Sikila buli likhuwa lili ne siise sialio ne ngila yalio, akhaba butinyu ne bwamenya khu mundu.

⁷Sikila se amanyile siina silabao tawe, ne naanu okana amuboleele nga kalaba?

⁸Mbao omundu oli ne bunyali bwe khukhiingilila kumwoyo namwe bunyali khu ndaalo yeewe eye lifwa tawe. Lino lili liie nilio khukhanyala khwebacha namwe khwakhola bubacha khwaona tawe.

⁹Nabona kano koosi nga nebaasia khu biindu bibiikholekha asi we nyanga, niio babaandu balala bali ne bunyali khu baandi mala babaumisia.

¹⁰Nio nabona babaandu bamayaanu ne basiikhwa. Bachichanga ne bengila ne khurura Abuundu Atakatifu, mala ne bafuma mu lukoba nimwo baba ne bakholiile bibiindu bienebio. Obuno bwosi se buli ne bukhala tawe.

¹¹Sikila kumunaanio khulwe bumayaanu se kwicha khangu tawe, ne babaandu berekekha khukhola bumayaanu.

¹²Omumayaanu akhaba ne akhola bumayaanu khukhwola kamakhabi emia ndala mala amenya, ese manyile ndi abo baria Wele baliba bulayi sikila bamuria.

¹³Ne kakhali bamayaanu se baliba bulayi tawe, akhaba omumayaanu se alileeyia bulamu bwewe nga sisiiniini tawe, sikila se aria Wele tawe.

¹⁴Kakekholekha khu sibala se kali ne bukhala tawe. Babaandu baluungi banyoola kumunaanio kwe bamayaanu, ne babaandu bamayaanu banyoola kumuruuru kwe buluungi. Ndoma ndi kano koosi se kali ne bukhala tawe.

¹⁵Ese fumia busangaafu, sikila omundu se ali ne sisiindu silayi asi we nyanga ne khukhali khulia, ne khunywa, ne khuchekha tawe. Sikila bino bicha khuba ne naye mu milimo kiewe khu ndaalo che bulamu bwewe nibwo Wele amua asi we nyanga.

¹⁶Nga neyika khumanya bukesi ne kakekholekha khu sibala necha namanya ndi omundu anyala areengecha siilo ne kumuusi.

¹⁷Nabona kimilimo kia Wele kioosi. Nabona ndi omundu se anyala amanya kimilimo kikiekholekhanga asi we nyanga tawe. Omundu akhakhaka ne kamaani ariena, se anyala khumanya tawe. Akhaba omundu omukesi ne aloma ali amanyile, se anyala amanya tawe.