Read lubukusu Omwil. 9 Bible Online

Omwil. 9 - lubukusu bible

Omwil. 9

¹Ne kakhali kano koosi nakebaasia. Nebaasia nga baluungi ne bakesi ne bikholwa biabwe ne bali mu buliindi bwa Wele. Bubeele busiime namwe ekileki, omundu se amanyile tawe. Buli sisiindu ebweeni wabwe se sili ne bukhala tawe.

²Butinyu bulala busa obwo nibwo bubwiicha khu muluungi ne khu mumayaanu, khu mulayi, ne khu mubi[4], khu mu miliiu ne khu munyaalu, khu oyo oaana chimbosio ne khu oyo okhaana chimbosio tawe. Omundu omulayi se akhila omumayaanu tawe. Omundu owichuba se akhila okhechuba tawe.

³Buno buli bumayaanu khwako koosi kakekholekha asi we nyanga. Butinyu bulala bubwiicha khu baandu boosi. Ne kimiooyo kie babaandu kiechula bumayaanu ne kamalalu, ne basiili balamu khukhwola nga ne bafwa.

⁴Ne oyo osiili omulamu ali ne lilieyikina, sikila embwa enamu ekhila Etalang'i efu.

⁵Balamu bamanyile bali balifwa, ne kakhali bafu se bamanyilekho sisiindu siosi siosi tawe namwe se balikho ne kumuruuru kukuundi tawe. Kakaabwe kebililwa khale.

⁶Lisiima liabwe, libiyila, ne libuba liabwe biabuna, ne se balikho lundi ne kumukabwa mu bioosi bibiikholekha asi we nyanga tawe.

⁷Cha, olie siakhulia siowo ne busangaafu, mala onywe endali yowo ne liliekhoya. Sikila Wele amala khufukiilila nibio okhola.

⁸Lekha chingubo chowo chibe chiwaanga buli lwoosi. Okhalekha khukhwiakha kamafura mumurwe mwowo tawe.

⁹Menya mu busangaafu no mukhasi niye wasiima, chindaalo chowo choosi che bulamu bwa busa nibwo Wele akhuelesia asi we nyanga. Okwo nikwo kumukabwa kwe bulamu bwowo, ne kimilimo kiowo nikio okhola asi we nyanga.

¹⁰Khola ne kamaani buli kumulimo nikwo onyala wakhola sikila e Makoombe niio olikho ocha eyo, mbaayo kumulimo, namwe kamebaasio namwe limanya namwe bukesi tawe.

¹¹Lundi nabona ndi asi we nyanga, batima chimbilo lukali se bali nibo baula mu mbilo buli lwoosi tawe, ne banyindaafu buli lwoosi se baula liie tawe. Babaandu bakesi se bali ne siakhulia buli lwoosi tawe, namwe be limanya se bali ne kimiaandu buli lwoosi tawe, namwe barekerefu se banyoola efuma buli lwoosi tawe. Ekhabi embi eli khu buli mundu.

¹²Se aliio omundu omanyile siise siewe tawe. Ali nga ching'eeni chitiilwa mu lutiimba luubi, lundi nga chinyuni chiaambwa ne kumureko. Nono babaandu baambwa mu siise sibi, ne kabakwakho matundubiikha.

¹³Lundi naboone sifwaani sie bukesi sino asi we nyanga, mala sialolekha khuba siboofu lukali khwise.

¹⁴Lwabao lukoba lutiiti lulwaba ne babaandu batiiti babalumenyamo. Ne omwami owe kamaani alwibwaakala. Alupania mala alubotookhelesia ne banamae bewe.

¹⁵Ne kakhali anyoolekhanamo omundu omutaambi mala omukesi lukali owaonia lukoba olwo. Ne kakhaba kario, mbao owakhebulila omundu omutaambi oyo tawe.

¹⁶Ne kakhali ndoma ndi, bukesi bukhila kamaani, akhaba bukesi bwo mutaambi ne bufwocholwa, ne kamakhuwa keewe ne kakhaulilwa tawe.

¹⁷Kamakhuwa ko mukesi kalomalomwa mu khweooya, kauliilikhana khukhila luyoka lwo mwami akari we kookwa eye basilu.

¹⁸Bukesi bukhila bulwaani bwe liie, ne kakhali omumayaanu mulala onaka bulayi bukali.