Read lubukusu Kumw. 2 Bible Online

Kumw. 2 - lubukusu bible

Kumw. 2

¹Ese ndi liua lia Sharoni, simuli sie mu matooma.

²Omusiime wase abonekha mu bakhaana, nga simuli sie mu mawa.

³Omusiime wase abonekha mu basoleeli, nga kumupopayi mu mirongooro kie mu musiru. Nekhala mu siniini siakwo mu busangaafu bukali, ne lituunda liakwo lili linulu khwise.

⁴Ambila munju eya naikara, mala andakho kumukhono kwe busiime.

⁵Ndwala sikila busiime, njikusie ne kimisabibu kimiomu, sangaasie ne kamapopayi.

⁶Netikiiye kumukhono kwewe kumukhasi, ne kumukhono kwewe kumuseecha kungwayila!

⁷Ee, bakhaana ba Yerusalemu ndakilisie, yechuba lukali, muli se mulengilila busiime bwefwe tawe.

⁸Nauliile kumumilo kwo musiime wase! Alikho echela mu bikulu ne atima, anausiaka mu ngulu.

⁹Omusiime wase ali nga kicheu, namwe nga ekhisi eng'ana. Lola, emile ao enyuma we lisiisi liefwe, aloleleele mu numa che kamatirisia, aloleleele buniinilo.

¹⁰Omusiime wase amboolela ali, “Yinyokha khuche, musiime wase, khalayi wase, yiicha khuche,

¹¹lola sikila kumunaane kwabirire, efula yebachile.

¹²Bimuli biamuliikhe khu sibala, siise sie khukhwimba siolile, ne kumumilo kwa musietuka, kuuliilikhana mu sibala siefwe.

¹³Kumutuli kwamile chinduli, ne kimisabibu kiamuliikhe bimuli biakio biiunya bulayi. Yinyokha khuche, musiime wase, khalayi wase yiicha khuche.

¹⁴Oli nga liuusi, liliekisile mu mbangaachi mwe lulwanda, lekha mbone bubweeni bwowo buuli bulayi, mala mbulile kumumilo kwowo kusiimisia.

¹⁵“Khuambile chinjusi, chinjusi ching'ana, chichonakanga biluundu bie kimisabibu, sikila kimisabibu kiefwe kiamile.”

¹⁶Omusiime wase ali wase, ne ese ndi wewe, aaya kumunyele kwe bibiaayo kwewe mu bimuli.

¹⁷Khukhwola nga enyanga ne esoa, mala nga bibiiniini ne biwelelela, omusiime wase kobola, ba busa nga kicheu namwe nga ekhisi eng'ana, khu bikulu bie kamabaale ka kakelekhana.