Read lubukusu Kumw. 3 Bible Online

Kumw. 3 - lubukusu bible

Kumw. 3

¹Nga mbechanga ne ngonile musilo, ndooranga omusiime wase, muyiimanga, ne kakhali se munyoolanga tawe.

²“Luno ndenyokha nje muyiime mu lukoba luboofu, khu ngila ne mu ngurianguria. Ndayiima niye kumwoyo kwase kwasiima.” Namuyiima ne se namunyoola tawe.

³Baliindi baanyoola, nga baba ne balambuula lukoba luboofu. Nabareeba ndi, “Mwambonelekho omusiime wase?”

⁴Siise sitiiti busa nga khwalekhana, ne nyoola omusiime wase. Namutiila mala se namulekhuula acha tawe, khukhwola nga ne namuyila munju eya maayi, mu lusiro nilwo nasaalilwamo.

⁵Bakhaana ba Yerusalemu ndakilisie, yechuba lukali, muli se mulengilila busiime bwefwe tawe.

⁶Siina sisiicha esio khukhwama mundaa, sisieulukuse nga liliisi, sili nga biiunya bulayi, bikusibwa ne baboofuli?

⁷Solomoni alikho echa bamumemeele mu ndebe yewe eye bubwami, ali ne banamae bamuliinda kamakhumi sita, baali barana mu Isiraeli.

⁸Boosi barana baboyile chimbalu che liie, bali babaalang'anyila liie, buli mulala ne mbalu yewe khwiraango, khukhwirekekha chingukuulo che siilo.

⁹Omwami Solomoni ekholela omwene endebe niyo bamumemelamo, khukhwama khu mirongooro kia Lebanoni.

¹⁰Bikele biayo biaba bie efwesa, kumukoongo kwayo kwe esahabu, endebe enapeenda mukari yanabwa mu busiime, ne bakhaana ba Yerusalemu.

¹¹Ee, bakhaana ba Sayuni, yiicha, lola omwami Solomoni, ne kuutwa niyo maawe amufwara, khu ndaalo eye siselelo siewe, khu ndaalo eye busangaafu mu mwoyo mwewe.