Read lubukusu Kumw. 4 Bible Online

Kumw. 4 - lubukusu bible

Kumw. 4

¹Lolakho, oli ne lukoondo lulayi musiime wase, lola oli ne lukoondo lulayi! Omoka bulayi nga liuusi, mu lububi lwowo. Lichuune liowo likhinakhina oli kumunyele kwe chimbusi, chichiikha khu mwiikha kwa Kileati.

²Kameeno kowo kali kamawaanga nga chinyaange, chichesiingile, mbao etibile akhaba ndala tawe, choosi chifwaanana.

³Kiminwa kiowo kili nga luusi lubesemu, ne lilomaloma liowo lisangaasia. Chisaya chowo mu lububi lwowo chili nga chimbabia che lituunda likomanga.

⁴Likosi liowo lili nga endeleelwa eya Daudi, lilayi lundi limiuufu, ne kamamili mwikosi nga chingabo eelefu.

⁵Kamaturu kowo kali nga ching'ana chikhwana cha kicheu, chichaya bimuli.

⁶Ndaba khu lukulu lwe biiunya bulayi, khukhwola mu mbeo eye mumakhelebende sisiilima ne siwao.

⁷Ewe oli omulayi ng'ali, musiime wase, se olikho ne bubi bwosi bwosi tawe.

⁸Yaa mukhaye, yiicha khurure Lebanoni, yiicha khurure fwembi Lebanoni. Yiikha khukhwama khu sikulu sia Amana, khukhwama khu sikulu sia Seniri ne Herimoni, khukhwama mu mabina ke chitalang'i, khukhwama khu bikulu bie chingwe.

⁹Ewe osangaasianga kumwoyo kwase, yaa, mukhaye wase, osangaasianga kumwoyo kwase ne limoka liowo, ne kamamili ke mwikosi mwowo.

¹⁰Busiime bwowo buli bulayi yaa, mukhaye wase, Busiime bwowo buli bulayi khukhila endali, ne kamafura kowo kakhila sisiindu sing'aa siosi siosi.

¹¹Mukhaaye wase, kumuketu kwe bubuukhi kuli khu minwa kiowo, bubuukhi ne kamabeele bili khu lulimi lwowo, chingubo chowo chiunya bulayi, nga kamafura kamalayi ka Lebanoni.

¹²Omusiime wase owe kumwoyo, omukhaaye wase ali siluundu sisiekisa, siluundu sisire, eningilo yabeene.[1]

¹³Kimili kiowo kili liruuti lie kimirongooro kie kamatuunda kamakomanga[2] ne kamatuunda kamalayi lukali, ne kamafura kalaangwa hena ne narito.

¹⁴Narito ne Safarani ne kumuchai ne bing'aa bulayi, ne kimirongooro kiosi kiunya bulayi, ne manemane nende bioosi bing'ailisia bulayi.

¹⁵Emoni eye sebele mu siluundu, esebele eye kameechi ke bulamu, ne chinjichi chibisia khukhwama mu Lebanoni.

¹⁶Siisimukha, Ewe, ekhuungu eye bunaswa, Ee, ekhuungu eye siafubo yiicha, ucha khu siluundu siase, lekha khuunya khulayi khufundeele. Lekha omusiime wase eche mu siluundu siewe, mala alie kamatuunda kasio kamalayi kakhila koosi.