Read lubukusu Kumw. 5 Bible Online

Kumw. 5 - lubukusu bible

Kumw. 5

¹Ningila mu siluundu siase, musiime we kumwoyo kwase, mukhaye wase, Mbuusia manemane yase ne bing'ailisia bulayi biase, ndia lisasara liase ne bubuukhi bwase, ese nywa endali ne kamabeele kase. Lia, enywe basaale, ne nywa; nywa lukali, enywe basiime!

²Nga yaba nengonile, kumwoyo kwase kwanaania, mala naroora ndi, omusiime wase alikho akhong'oonda khu muliango. “Njikulileo yaa, omusiime owe kumwoyo kwase, oli nga liuusi. Kumurwe kwase kwanyirire khubeela luume, ne lichuune liase lianyirire sikila kamame.”

³Abeele nefuulile, siina sikila nefware lundi? Abeele nesiingile bikele, siina sikila mbilabuusie lundi?

⁴Omusiime wase aatiila khu sikhomekho sie kumuliango, kumwoyo kwase kwekhoya.

⁵Nenyokha khukhwikulilao omusiime wase, ne kamakhono kase kechuule kamafura kamalayi, ne chinjala chase chiroonya busa, nga natiila khu sikhomekho sie kumuliango.

⁶Nekulila omusiime wase, ne kakhali omusiime wase aba achiile, nekoomba khuulilakho kumumilo kwewe. Namuyiima ne se namunyoola tawe. Namulaanga, ne se angobosia tawe.

⁷Baliindi baliindanga lukoba luboofu banyoola, bakhupa mala nang'ukha, baliindi chana bandabulaka chingubo.

⁸Bakhaana ba Yerusalemu, mwekongochela, ne munyoola omusiime wase, muboolele muli ndwala sikila busiime.

⁹Ee, omulayi lukali mu bakhasi, omusiime wowo ali nasi khukhila omusiime okundi? Omusiime wowo ali nasi khukhila omusiime okundi, nio okhwekoonjeelele efwe orio?

¹⁰Omusiime wase omumiliiu lundi omubesemu pe, amanyikhaane mu baandu chielefu ekhumi.

¹¹Kumurwe kwewe kuli kumulayi nga esahabu endayi lukali, ali ne lichuune lilayi, limali nga nasimali.

¹²Chimoni chewe chili chindayi nga che liuusi, a sebele, esiingile eng'oonile bulayi.

¹³Chisaya chewe chili nga biluundu bilayi, kiminwa kiewe kili nga bimuli biroonya biiunya bulayi.

¹⁴Kamakhono kewe kakhomela bulayi, mala afwara chimbete ching'enang'ena che bukusi bukali. Kumubili kwewe kuli kumumiufu nga kumusaanga, kukwarerwamo kamabaale kang'enang'ena.

¹⁵Bikele biewe bili nga chinjeko che libaale liwaanga, chichasimikhwa mu maloo ke esahabu. Lukoondo lwewe luli nga Lebanoni lulayi nga kumutarakwa.

¹⁶Lilomaloma liewe lilayi lukali, mala ali osiimisia lukali. Bakhaana ba Yerusalemu, Oyuno ali omusiime wase, lundi omusaale wase.