Read lubukusu Kumw. 7 Bible Online

Kumw. 7 - lubukusu bible

Kumw. 7

¹Bikhandakilo biowo bisiimisia lukali mu biraaro! Ewe owe yabwana owe ebwami, Kamaraango kowo kali kamamiufu nga niko omundu aapilila.

²Ekhofu yowo eli nga sibuumba siikhawamo endali tawe, Enda yowo eli nga kumukuunda kwe ngaanu kukwabotookhelelwa ne bimuli.

³Kamaturu kowo kali nga chimbobo,

⁴Likosi liowo lili lilayi nga kumusaanga, chimoni chowo chindayi nga kamatiisi ka Heshiboni embi ne silibwa sie lukoba luboofu. Lilioolu liowo lili lilayi nga endeleelwa eya Lebanoni, niyo bemangakho ne baliinda lukoba lwa Damasika.

⁵Kumurwe kwowo kuli angaki nga sikulu sia Karimeli, ne lichuune liowo ling'enang'ena oli engubo eya Katani, omwami anyala akhwekoomba.

⁶Ewe oli omulayi lundi omusangaafu lukali, omukhaana osangaasia lundi owasiimwa!

⁷Ewe osiimisia nga lukheendu, ne kamaturu kowo kali nga kamakheendu kalwo.

⁸Ndoma ndi ndaniina khu mukheendu, mala neambe khu sakia chakwo, Ee, kamaturu kowo kabe nga bisusuuchu bie kumusabibu, bulayi bwe kumuuya kwowo buli nga kamapopayi,

⁹ne khukhunuuna khwowo emunwa khube nga endali endayi lukali, eyiikha amumilo bulayi, eyiseletekha khu munwa ne khu meno.

¹⁰Ese ndi wo musiime wase, ali ne silukuluku khwise.

¹¹Musiime wase, yiicha khuche khukeende mu birekere, mala khubeyo siilo sioosi.

¹²Khuune makhelebeende mu mikuunda kie kimisabibu, mala khuyame kimisabibu ne kiamile, khulole chisabibu ne chimulikhe, ne kimikomanga ne kimiliikhe. Ebweeneyo ndakhwekesia busiime bwase.

¹³Ee musiime wase, chimbuunwe chiunya kumuuya kumulayi, ne amuliango wefwe, kamatuunda kamalayi koosi kaliio ka luno nende niko babuta khale niko nakhubiikhila.