Read lubukusu Kumw. 8 Bible Online

Kumw. 8 - lubukusu bible

Kumw. 8

¹Ee, baanga oli wandayaase, owanuuna lituru lia maayi! Khunyoola enje andi nakhwekwayila, andi se abao owandomayo tawe.

²Andi nakhurangiriire ne khukhuyila munju mwa maayi, ne mu lusiro lwa maayi wasaala. Andi nakhuele endali etubasiibwe ne bing'aa bulayi onywe, endali eye kamakomanga kase.

³Ee, andi netikiiye kumukhono kwewe kumukhasi, ne kumukhono kwewe kumuseecha kungwayila.

⁴Bakhaana ba Yerusalemu yechuba muli, se mulengilila busiime bwefwe tawe.

⁵Naanu oyo olikho wicha khukhwama mu sichiimi, ne batilaane no musiime wewe? Nakhusiisimusia asi we kumupopayi, Abwenao niio ewe wachuunila mao, abwenao niio maao akhusaalila naali mu buchuuni.

⁶Khole ese mbe kumuuri mu mwoyo kwowo, mbe nga kumuuri khu mukhono kwowo, sikila busiime buli ne kamaani nga lifwa, likhendekha liabwo lili lirafu nga siliindwa, Chimbeni chabwo chili chimbeni che kumulilo, kumulilo kukwirika lukali.

⁷Kameechi kamakali se kanyala kasimia busiime tawe, namwe kameechi kakechula se kanyala kabusimia tawe. Kaaba bali omundu akhaka khukula busiime, kimiaandu kioosi kie munju mwewe kiliwa busa, mala anyoole chisoni.

⁸Efwe khuli no mukhaana wefwe, mala se ali ne kamaturu tawe. Khulikholela siina omwana wefwe yuno, mu ndaalo niyo baliicha khumuselela?

⁹Aaba ne ali lisiisi, khuliombakhakho lukoba lwe fwesa, ne kakhali aaba kumuliango, khulimusirira lumako lwe kimitarakwa.

¹⁰Ese naba lisiisi, ne kamaturu kase kaba nga chindeleelwa, nio mu moni chewe naba oreera kumuleembe.

¹¹Solomoni aba ne siluundu sie kimisabibu e Baali-hamoni, apa siluundu kumusiingo khu baliindi be bibiaamo, buli mulala alaka khureera bitonyi eelefu ndala bie fwesa.

¹²Siluundu siase sie kimisabibu sili sisiase, sisiase samwene, ewe, Ee, Solomoni, onyala waba ne eelefu, ne baliindi be biluundu chimia chibili.

¹³Ee, ewe ooli mu biluundu, babasiaase berekekhe khuulila kumumilo kwowo.

¹⁴Musiime wase, khola khangu, mala obe nga kicheu namwe emboongo eng'ana, khu bikulu khwe bing'aa bulayi.