Read lubukusu Isa. 10 Bible Online

Isa. 10 - lubukusu bible

Isa. 10

¹Bali ne silaamo abo babekhochoocha ne khurao kamalaka kamakhiikha, ne babaandi bachiilililanga khuandika ke khukhupia sibi babaandu base!

²Mukhiingilila bataambi khunyoola bung'ali ne buluungi bwabwe. Muyaayanga murio kimiaandu kie banamulekhwa ne bafuubi.

³Enywe mulakhola siina mu ndaalo niyo Wele alamuelesia siiukuumo. Enywe mulakhola siina nga ndamureerera embembeesi eye butinyu khukhwama mu sibala sie aleeyi? Mulelukhila wa naanu munyooleyo buyeeti? Mulakisa wae kimiaandu kienywe?

⁴Mbao sisiindu sisiindi tawe ne kakhali mwakhaba ne mwekisa mu baboe namwe mwakhakwa mu bafu. Kakhaba kario lirima lia Wele Omunyali Owa Bioosi se liliakamao tawe, asibokeselela busa kumukhono kwewe khubaukuuma.

⁵ Wele Omunyali Owa Bioosi aboola ali, “Ashuru! Ese ndumikhira Ashuru nga esiimbo khuukuuma abo nibo naambila lirima.

⁶Ese nduma Ashuru khukhwibwaakala ekholo ekhamanyile Wele tawe, babaandu babakhola ese naambwa lirima. Ndabaruma bayaaye lundi beebe ne khuswalakilila babaandu nga eng'unda eye khu ngila.”

⁷Ne Omwami owa Ashuru se ali ne lirekekha liewe, namwe libaasia liewe khukhola kano tawe, ne kakhali arekeekhe khubunia chikholo chingali.

⁸Ebuyila ali, “Buli mundu khu bemeelesi base ali omwami?

⁹Naula chingoba cha Kalino, Karikemishi, chingoba cha Hamati ne Aripadi, naula Samaria ne Damasika.

¹⁰Nakololosia kumukhono kwase khuukuuma bubwami obwo busaaya bifwaani, bifwaani bikali bikhila bia Yerusalemu ne Samaria.

¹¹Nabunia Samaria ne bifwaani biasio bioosi, ne ndakhola ndio Yerusalemu ne bifwaani nibio basaayanga ebweeneyo.”

¹²Ne Wele Omunyali Owa Bioosi aboola ali, “Nga nemala nisio ndikho khola khu sikulu sia Sayuni ne mu Yerusalemu ndiukuuma omwami owa Ashuru khulwe liliebuyila liewe lioosi, ne liliebonia liewe.”

¹³Omwami owa Ashuru ebuyila ali, “Ese samwene wakholile koosi kano ne kamaani ke kumukhono kwase, sikila ndi omukesi, narusiisieo chinjakha choosi, akari we chikholo mala nayaayile nibio babuunga. Ese naba nga euunwa naswalakilila babaandu babamiiamo.

¹⁴Chikholo che sibala chaba nga biswi bie chinyuni mala nabuusia kimiaandu kiabwe bwangu busa nga obuusia kamaki kakhali no mwene tawe. Ne seliio ekholo enyuma nandala eyapapasia lutaa khukhundiisia tawe, ne seliio eyasama kumunwa namwe eyamboochelela tawe!”

¹⁵Ne Wele Omunyali Owa Bioosi aboola ali, “Eaywa enyala yebuyila khuba eye bukhala khukhila okiremera ku? Namwe kumusiameno kukhila omundu okukhalila ku? Eruungu se sutanga omundu tawe, omundu niye osutanga eruungu.”

¹⁶Khwako Wele Omunyali Owa Bioosi alikho acha khuruma lufu luniaasia banamae balia bulayi abo. Mu mibili kiabwe kumulilo kukhabemo kuchiililila kuburukha.

¹⁷Wele ooli buwaanga bwa Isiraeli akhekele nga kumulilo. Omutakatifu owa Isiraeli alekela nga kumulilo kukwirika kukwosia buli sisiindu mu ndaalo ndala yong'ene, akhaba kamawa ne embululwe.

¹⁸Efuma eye kimisiru kiewe kie bulimi Wele Omunyali Owa Bioosi acha khwonaka kumwoyo ne kumubili, nga lufu lulwiira ne lubunia omundu.

¹⁹Kimirongooro kie kumusiru kuno kilirama mitiiti, nikio akhaba omwana anyala khubala.

²⁰Endaalo elikho yiicha ba Isiraeli babarama se baleyikina lundi ekholo eyenga khubamala tawe. Ng'ali balisuubila mu Wele Omunyali Owa Bioosi, Wele Omutakatifu owa Isiraeli.

²¹Babaandu batiiti babarama ba Yakobo balikobola khu Wele wabwe we bunyali.

²² Kakhaba kario babaandu ba Isiraeli bakhaba bakali nga kumuyekhe kwe nyanja, batiiti busa bari balikobola. Libuna liabisiibwe, mala liechuule ne buluungi.

²³Omwami WELE we banamae acha khukhola kano koosi, mu sibala nga ne aloma ali alikhola.

²⁴Omwami WELE we banamae aboolela babaandu bewe ba baamenya mu Sayuni ali, “Enywe baandu base, mu menyile mu Sayuni, mukharia Baashuru tawe, bakhaba ne bamupia siibi nga Bamisiri ne bamukholelanga.

²⁵Siise siaramire sikeekhe siri ne ese ndamuukuuma enywe, mala ndabaambila nibo lirima ne khubabunia.

²⁶Ese Wele Omunyali Owa Bioosi khabapile siboko siase nga ne naapa babaandu ba Midiani e Lwanda lwa Orebu. Ese khaukuume Ashuru bulayi bwene busa nga ne naukuuma Misiri mu nyanja.

²⁷Endaalo eyo ne lioola, ndimulekhuula enywe murure mu bunyali bwa Ashuru, ne lichooki liabwe se limusitoela khu mabeka kenywe tawe sikila kamafura.”

²⁸Omusiku omunamae waambile lukoba lwa Aiati! Babiriire mu Mikironi! Balekha biakhulia biabwe e Mikinashi!

²⁹Bambukhe bali sikelekha babirire abubiriro bakonile silo esio e Keba! Babaandu be mu lukoba lwa Ramasi bariire lukali mala babaandu be mu Kileati, lukoba lwo mwami Saulo belukhe.

³⁰Babaandu be Kalimu khupa lulwang'a! Babaandu be Laisha, rekeeresia! Babaandu be Anatoti, kobosia!

³¹Babaandu be Matimena nende be Kebimu balikho belukha baone.

³²Luno basiku bali mu lukoba lwa Nobu, ne ebweeneyo balikho basisiikha bifuusi biabwe khu sikulu sia Sayuni lukoba lwa Yerusalemu.

³³Wele Omunyali Owa Bioosi owe banamae alabatonya nga chisakia chiremirwe ne kamaani koosi, chianukha khukhwama khu murongooro. Babelola ne beniinia lukali khu nibo balaremwa baanulwe bakwe asi, mala balachangalasibwa.

³⁴Wele Omunyali Owa Bioosi alabarema bakwe nga kimirongooro mu musiru akari ne kiremwa ne aywa, nga akhaba kimirongooro kimilayi lukali nga kia Lebanoni ne kikwa!