Read lubukusu Isa. 11 Bible Online

Isa. 11 - lubukusu bible

Isa. 11

¹ Lisaafu liliana lilirubura khu sisina sia Chesi, ne lusakia luliaama khukhwama khu mili kiewe.

²Roho owa Wele Omunyali Owa Bioosi alimubaakho, Roho we limanya ne liiulila, Roho we bukaambisi ne bunyali, Roho we bukesi ne khuria Wele Omunyali Owa Bioosi.

³Ne busangaafu bwewe buliba mu buri bwa Wele Omunyali Owa Bioosi. Se alikhalaka khu niko abona ne chimoni chewe tawe, namwe akhalake khulondekhana nga naulila ne kamaru kewe tawe,

⁴ ne kakhali acha khukhalakila bataambi mu bung'ali, mala akhalake abwene khulwa baolu be sibala, aliipila sibala eruungu eye kumunwa kwewe, ne aliira bamayaanu ne kumuuya kwe kiminwa kiewe.

⁵ Bung'ali bucha khuba kumusiipi kwe munda mwewe, ne busuubilwa kumusiipi kwe khukhwiboela mu sibuno mwewe.

⁶ Sisuuche silimenya ne limeeme, ne engwe elikona alala ne meeme, ne emoosi ne talang'i biliayila alala, ne omwana omukeekhe alibirangirira.

⁷Ekhaafu eliayila alala ne sibulukhu, ching'ana chabio chilikona alala, ne talang'i elilia bunyaasi nga ekhaafu.

⁸Omwana onuuna alinyayila siimbi ne liloo lie ndemu kheendu, ne omwana owalata alira lulwaala lwewe mu liloo lia nafwo.

⁹ Khu sikulu sitakatifu sia Wele, sia Sayuni, se silibakho sisiindu siiumisia namwe simayaana tawe, sibala silichula bukesi bwa Wele Omunyali Owa Bioosi, nga chinyanja ne chechula kameechi.

¹⁰ Mu ndaalo eyo sisina sia Chesi siliima nga simanyilo khulwe babaandu Be Chikholo choosi balimuyiima niye, ne abuundu wewe we khumenya aliba we luyali.

¹¹Mu ndaalo eyo Omwami alirumikhira bunyali bwewe lukhola khabili khureera babaandu bewe babarama khukhwama e Ashuru, e Misiri, e Paturusi, e Kushi, Elamu, e Shinari, e Hamati, ne khukhwama khundulo khwe Nyanja.

¹²Aliimikha simanyilo khulwe chikholo, mala abuusie Baisiraeli babamwaatwa, alibuusia Bayuda babasalaanila khukhwama mu mbeka chine che sibala.

¹³Likhendekha lia Efuraimu liliruramo, ne abo babakubenga Yuda baliakama, Efuraimu se alibubilakho Yuda tawe, ne Yuda se alikubenga Efuraimu tawe.

¹⁴Ne kakhali boosi alala baliibwakala Bafilisiti baali lubeka lwe mumbo, alala baliyaaya babaandu be bukwe. Balipa babaandu ba Edomu ne Moabu, ne Bamonite balifukiilila kakabwe.

¹⁵ Wele Omunyali Owa Bioosi aliteenyesela elala kumukhono kwe nyanja eya Misiri, ne mbeo yeewe eyomia, alisisiikha kumukhono kwewe khu luuchi lwa Efurati. Alilupamo chinjichi saba, nio babaandu balwambukhe ne bikele biabwe bibalakafu.

¹⁶Elibaayo engila emboofu khukhwama Ashuru, khulwe babaandu bewe babarama, nga ne liaba khu Isiraeli, nga ne baama mu sibala sia Misiri.