Read lubukusu Isa. 13 Bible Online

Isa. 13 - lubukusu bible

Isa. 13

¹ Buno buli burume khu Babiloni nibwo Isaya okhwa Amozi anyoola khukhwama khu Wele.

²Ra simanyisio sie liie khu ndeleelwa khwe sikulu sili busa. Langilila banamae mala basakule ne kumukhono kwowo, nga simanyisio khukhwingila mu bilibwa bie lukoba lwe bukoosi.

³Wele Omunyali Owa Bioosi alangile banamae bewe babebonia lundi baali ne lilieyikina khu khupana liie litakatifu mala aukuume abo nibo aambila lirima.

⁴Rekeeresia luyoka khukhwama khu bikulu, luuliilikha nga lwe sipupu siboofu sie babaandu, liuliilikha lie libusiana lie chikholo ne bubwami. Wele Omunyali Owa Bioosi we bunyali alikho arekekha banamae bewe khulwe liie.

⁵Balikho bama mu bibala bie aleeyi, khundulo khwe bibala. Wele Omunyali Owa Bioosi mu lirima liewe alikho acha khubunia sibala sioosi.

⁶ Yesasaara mu burafu! Endaalo eya Wele Omunyali Owa Bioosi eli siimbi, niyo Omunyali alirererakho libunia.

⁷Khwako kamakhono ka buli mundu kiliwamo kamaani, mala buli mundu aliyengukha kumwoyo.

⁸Boosi baliria mala barangararwe ne buchuuni, nga khulumwa khwo mukhasi nali siimbi khusaala. Baliloleelelana babeene ne babeene mu buri, mala baliambwa chisoni.

⁹Endaalo eya Wele Omunyali Owa Bioosi, elikho yiicha, endaalo ekhalafu eye lirima liewe liriisia ne burafu. Sibala silikholwa sichiimi, ne buli omumayaanu alibunisibwa.

¹⁰ Ne buli ng'enieesi ne bisusuuchu biacho biliakama khukhosia, enyanga ekhakame khukhosia nelikho esoa, ne kumwesi se kulikhosia tawe.

¹¹Ndaukuuma sibala khulwe butinyu bwasio, ne babaandu bamayaanu boosi khulwe bubi bwabwe. Buli mundu owebonia ndimuchangalasia, mala aambie chisoni buli mundu owebonia nomukhalafu.

¹²Baseecha bakhabe batiiti nga esahabu endayi, babaandu boosi nga esahabu eya ofiri.

¹³Khwako ndikhola likulu lireenge, ne sibala siteremele abuundu wasio, khu ndaalo niyo ese Wele Omunyali Owa Bioosi ndiekeseliakho lirima liase.

¹⁴Nga kicheu niyo baayile namwe kamakheese kataamba omwaayi, buli mundu alikobola mu baandu bewe, ne buli mundu aliilukha akobole mu sibala siewe. Yesi yesi olinyoolekhana aliunakwa.

¹⁵Yesi yesi oliaambwa aliirwa ne mbalu.

¹⁶Babaana babwe baliremakakwa mumoni chabwe berwe, kimiaandu kie mu chinju chabwe kiliyaaywa ne basiku chana balikwa khu bakhasi babwe.

¹⁷Wele Omunyali Owa Bioosi aboola ali, “Ndikho mbachilisia Baamedi bebwaakale Babiloni, se babala efwesa neli siindu tawe, lundi se basangaalila esahabu tawe.

¹⁸Bakhere basoleeli ne buembo. Se balikholelakho batoro siisa tawe, ne se balikholela babaana siisa tawe.

¹⁹ Babiloni buli bubwami bwe luyali lukali khukhila bubwami bwoosi, buli esaambo ne lukhole lwe Bakalutayo, Ne, ese Wele Omunyali Owa Bioosi ndikwisia Babiloni nga ne nakhola Sodomu ne Komora!

²⁰Salibao omundu na mulala olilumenyamo lundi tawe. Salibao omwaraabu na mulala oliombakha liiema liewe ebweeneyo tawe, namwe salibao omwaayi na mulala oliaya lituuli liewe ebweeneyo tawe.

²¹ Ne kakhali aliba abuundu niio chisolo che mu sichiimi chimenya, nende niio chisikhiikhi chombakha biswi biacho. Chinyeefwe chilimenyayo, ne bifwaani bie bawele bilikhinilayo.

²²Namuunyu kiliuumila mu ndeleelwa chabwe, ne chingipwe mu machipi kabwe kamalayi. Siise sia Babiloni siolile! Chindaalo chalwo chaweele.”