Read lubukusu Isa. 14 Bible Online

Isa. 14 - lubukusu bible

Isa. 14

¹Wele Omunyali Owa Bioosi lundi alikholela babaandu ba Isiraeli siisa mala alibarobora lundi babe babewe. Alibalekhuula bamenye lundi mu sibala siabwe, baakwa baliambaana ne Isiraeli mala bamenyemo nabo.

²Chikholo chingali chiliyeeta babaandu be nju eya Isiraeli bakobole mu sibala nisio Wele Omunyali Owa Bioosi abaelesia mala ebweeneyo chikholo chilikholela Isiraeli nga nasioobi. Isiraeli eliaamba abo ba baaba ne bakiamba niyo khale, mala babaandu be nju eya Isiraeli baliamiia khu baandu ba baapianga sibi khale.

³Wele Omunyali Owa Bioosi alielesia babaandu be nju eya Isiraeli liola khukhwama mu burafu ne buchuuni bwabwe ne khukhwama khu milimo kimiandalafu nikio bayingiliilwanga khukhola.

⁴Nga ne aliba ne akhola kano, aliba alikho achekheelela Omwami owa Babiloni ne aloma ali, “Omwami omukuluumi akwile! Lundi se aliipia sibi omundu yesi yesi tawe!

⁵Wele Omunyali Owa Bioosi akaamie bunyali bwe babaami bamayaanu,

⁶babapia siibi babaandu mwirima ne se bakama khu khuupia sibi chikholo nicho baula tawe.

⁷Nono luno khumaliilikha sibala sioosi siekhoyeele liola ne kumuleembe mala buli mundu etikita ne khukhwimba.

⁸Kimirongooro kia Saipurasi ne kimirongooro kimitarakwa kia Lebanoni, kiekhoyela likwa lio mwami, sikila se aliio luno okirema tawe! Sikila afwiile!

⁹“Sibala sie makoombe silikho sierekekha khukhwakaanila omwami owa Babiloni. Bimakoombe biabo bibiaba ne bunyali khu sibala bilikho biaachilisia. Bimakoombe bie babaami bilikho binyokha mu ndebe chabwe che bubwami.

¹⁰Boosi balikho bamulaanga ne baboola bali, ‘Luno ewe wesi wekelile omutekhele busa nga efwe! Ewe wesi oli busa mulala khwifwe!

¹¹Wabechanga aa bakhuupila kamatuungu khulwe khu khukoosia ne lola luno oli ano mu sibala sie makoombe. Okona khu bulili bwe chinyeende mala sisibiimbilo siowo sili chinyeende ching'ene.’

¹² “Omwami owa Babiloni, eng'enieesi eya Sulwe ewe wakwile khukhwama mwikulu! Khale ewe waula chikholo, ne luno wekhisiibwe asi.

¹³ Ewe waboola mu mwoyo kwowo oli, Ndaniina khukhwola mwikulu angaaki we ching'enieesi cha Wele, ndara endebe eye bubwami bwase angaaki, ndekhala khu sikulu siili ebunaswa, niio bawele babuusianila.

¹⁴Waboola oli okhaniine khu ngaaki khwe kamaleesi, mala obe nga owe Angaaki Lukali.

¹⁵Ne kakhali wekhisiibwe asi, wamwaatiilwe mu sibala sie makoombe asi pibibiibi.

¹⁶“Bamakoombe balakhuungusa ne khukhurangaara mala bareebe bali, ‘Omundu yuno se ali niye owasisiikha sibala, mala ateremia bubwami tawe ku?

¹⁷Omundu yuno se ali niye owabunia chingoba, ne se ali niye owakaluukhasia sibala siekela sisiangalaamwe tawe ku? Omundu yuno se ali niye okhalekhuulanga baboe bewe be mu liie bakobola engo wabwe tawe ku?’

¹⁸Babaami boosi be mu sibala basiikhwa mu biliindwa biabwe bie lukoosi buli mundu mu siewe,

¹⁹ne ewe se oli ne siliindwa tawe, ne kumubili kwowo kwamwaatiilwe enje kubole. Kwafunikhwa ne kimibili kie banamae babererwa mwiie, kwamwaatibwa alala ne kikiabwe mu luongwa lwe kamabaale mala kiaswalakiliilwe.

²⁰Sikila ewe wonaka sibala siowo, mala wera babaandu bowo, solisiikhwa ne lukoosi nga babaami babaandi tawe. Se aliio na mulala omumayaanu khu be nju yowo olirama atiuukhwe lisina tawe.

²¹Lekha khusiinja khwe basoleeli khurakikhe! Basoleeli bo mwami yuno balifwa sikila bumayaanu bwe bakuka babwe se aliio na mulala khu nibo oliamiia sibala namwe ombakhe chingoba chimboofu chingali khu sibala tawe.”

²²Wele Omunyali Owa Bioosi owe banamae aboola ali, “Ndebwaakala Babiloni mala ndutechule. Se ndiramia sisiindu tawe, babaana se balirama tawe, mbao baliona na akeekhe ene tawe. Ese Wele Omunyali Owa Bioosi nalomile.

²³Ndikaluukhasia Babiloni lwikele ekeewa eye kamatiisi ne chingili chilimenyayo. Ndieyela Babiloni siyeywe sie khubunia. Ese, Wele Omunyali Owa Bioosi owe banamae nalomile.”

²⁴ Wele Omunyali Owa Bioosi owe banamae echubile ali, “Nga ndekeekhe kalaba kario. Lundi nga mbisiisie nono kalaba busa kario.

²⁵Ndabunia Baashuru bali mu sibala sia Isiraeli, mala mbaswalakilile khu bikulu biase. Ndalekhuula babaandu base khukhwama khu lichooki lie Baashuru, ne khukhwama khu busiro nibwo batiuukhwa khu mabeka.”

²⁶Buno nibwo bukhalaki bwa Wele Omunyali Owa Bioosi, khu sibala sioosi; sino nisio siiukuumo nisio alarusia, khu bibala bioosi.

²⁷Wele Omunyali Owa Bioosi owe banamae abisiisie khukhola lino, okeseleele ne kumukhono kwewe khu khuupia siibi, mala se aliio onyala amukhiingilila khukhola ario tawe.

²⁸ Obuno buli burume bubwalaangililwa mu mwiiko nikwo Omwami Ahasi afwilakho.

²⁹ Enywe babaandu ba Filisiti lola, esiimbo eyamupilenge enywe yafuniikhe, ne se mulikho ne sifuno sie khusangaala tawe. Nga endemu nefwa, ekiindi eye buchiba burafu yilao. Liki lie ndemu lialula kuremu kuupurukha.

³⁰Wele Omunyali Owa Bioosi aliba omwaayi khu baandu bewe bataambi mala alibalekhuula bamenye bulayi mu muleembe. Ne enywe Bafilisiti, akhamurumire enjala endafu, mala se liramia mulala khwinywe omulamu tawe.

³¹Enywe chingoba che Bafilisiti mweesi kukuula ne khulila! Enywe mweesi ba ne buuri, liliisi lieulukuse ebunaswa ne se aliio owimile tawe.

³²Efwe khulakobosia barumwa babamile Filisiti khuli sina? Khulababoolela khuli, “Wele Omunyali Owa Bioosi emekhe Sayuni, mala babaandu bewe babanaanisibwanga balinyoolamo buyeeti.”