Read lubukusu Isa. 16 Bible Online

Isa. 16 - lubukusu bible

Isa. 16

¹Babaandu ba Moabu barumiire omwami owa Yerusalemu kamameeme, nga siianwa khukhwama mu lukoba lwa Sela lwe mu siangalaamwe.

²Balindiililanga khu sikiingi sie Luluuchi lwa Arimoni mala bayiiya busa eyi ne neyi nga chinyuni nicho bapurusie charura mu biswi biacho.

³Baboolela babaandu ba Yuda bali, “Khuboolele efwe nisio khukhola. Khukhinge efwe nga kumurongooro ne kuaana sisiniini enyanga neangile, ne lekha efwe khuolele musiniini siowo, Efwe khuli babelukha busiku, Khukukhuulile niio omundu akhakhunyoola tawe.

⁴Khulekhe efwe khumenye mu sibala sienywe nga babelukha busiku, khulinde khukhwama khwaabo babenya khu khubunia.” Khukuluumia ne khu khuupia siibi biliakama, ne lilionaka liosi likhaweo.

⁵Nono mulala khu be lisaaye lia Daudi aliba omwami ne aliamiia babaandu ne busuubilwa ne busiime. Aliba khangu khukhola lili liluungi mala alibona ali bung'ali bulikho bukholwa.

⁶Babaandu ba Yuda baboola bali, “Efwe khwaulila bali babaandu ba Moabu bali be liliebonia. Khumanyile khuli bali be nginia, sileka ne khukhweniinia, ne khukhwifumia khwabwe khuli busa.”

⁷Khwako lekha babaandu ba Moabu balile lekha buli mulala alilile Moabu, lila, mwapilwe lukali khulwe biakhulia bie mu lukoba lwa Kiri-Hareseti.

⁸Kimikuunda kili siimbi Heshiboni ne kimikuunda kie kimisabibu kia Sibuma kionakwe kimikuunda kie kimisabibu nikio babaami be chikholo bameelanga kamalwa kiakio. Asiise silala kimisabibu kialaama kiacha kiola mu lukoba lwa Yaseri, ne khukhwola lubeka lwe bukwe mu siangalaamwe ne lubeka lwe mumbo, elubeka luluundi lwe Nyanja eya Chumbe.

⁹Khwako ese luno ndikho ndila kimisabibu kia Sibuma bulayi bwene nga nendikho ndila Yaseri. Ese ngwisilia Heshiboni kamasika ne Eleale, sikila likesa selilio lisangaasia babaandu tawe.

¹⁰Salikhoo omundu na mulala mu saambu che ngakha osangaalile tawe. Se aliio na mulala oyokela namwe olikho wimba mu mikuunda kie kimisabibu tawe. Se aliio na mulala osuura kimisabibu ang'oonemo endali tawe. Buyoka bwe liliekhoya bwakaame.

¹¹Neunamila mu bubeeleli khulwa Moabu ne bukhalafu khulwa Kiri-Hareseti.

¹²Bamoabu beluya busa khucha mu bikulu biabwe khukhwisaaya bifwaani ne mu ngaangu chabwe khu saba, se lilabayeetakho sisiindu tawe.

¹³Obwo nibwo burume nibwo Wele Omunyali Owa Bioosi aana khulwa Moabu mu ndaalo chichabira.

¹⁴Ne luno Wele Omunyali Owa Bioosi aboola ali, “Mu miiko kitaru nga kimiiko kio mukholi, efuma eya Moabu eliaambwa chisoni, yakhaba ne babaandu bakali balirama batiiti lundi batekhele.”