Read lubukusu Isa. 17 Bible Online

Isa. 17 - lubukusu bible

Isa. 17

¹ Wele Omunyali Owa Bioosi aboola ali, “Damasika se luliba lundi lukoba tawe, ne kakhali luliba busa nga kamauumbu kakatechukha.

²Chingoba chimboofu cha Ashuru chilianjukhwa elala. Chiliba kamaayilwe ke bibiaayo ne chikhaafu, ne se aliio olichitimania achirusiemo tawe.

³Isiraeli se luliba nomuabini tawe, ne Damasika lulitibia bubwami bwalwo. Ne Baashuru baliirama baliba nga luyali lwe babaandu ba Isiraeli. Ese Wele Omunyali Owa Bioosi owe banamae nalomile.”

⁴Wele Omunyali Owa Bioosi aboola ali, “Endaalo elikho yiicha niyo luyali lwa Yakobo lulakama, ne bunefu bwewe bulawa.

⁵Isiraeli eliba nga lusaambu nilwo bakesilemo engaanu, lwanjukhwe nga lusaambu lwe mu Litooma lia Refaimu ne lukesilwe lwarama busa.

⁶Babaandu bakeekhe busa bong'ene balirama, mala Isiraeli eliba nga kumurongooro kumuseituni nikwo babutilekho chiseituni choosi, baramiakho chibili namwe chitaru khu ngaaki lukali, namwe charamakho ngekhe chiri busa mu sakia che asi. Ese Wele Omunyali Owa Bioosi, Wele owa Isiraeli nalomile.”

⁷Nga endaalo eyo neliola, babaandu balikobola baenje buyeeti khukhwama khu Mubuumbi wabwe, oli Wele Omutakatifu owa Isiraeli.

⁸Se balieyikina chi alutare nicho bombakha babeene tawe, namwe basuubile mu nikio kamakhono kabwe kakhola, mu bifwaani bia wele omukhasi Ashera ne chi alutare che khukhwoseliakho biiunya kumuuya kumulayi tawe.

⁹Nga endaalo eyo ne liola chingoba chimboofu chilianjukhwa mala chilekhwe ne chitechulwe ne chili mu maumbu nga chingoba che Bahibi ne Baamori, nga baliba ne belukha babaandu ba Isiraeli.

¹⁰Sikila Ewe Isiraeli, webilila Wele owe buonia bwowo, mala se wakhebulila lulwanda nilwo oonelamo tawe. Ne kakhali wabiaala kimikuunda kimitakatifu nio osaaye wele be chikholo chichiindi.

¹¹Ne biakhaba ne bimela mala biamulikha kumutikhinyi kumwene nikwo biamiichilwakho, likesa se lilibao tawe. Butinyu bwong'ene ne burafu bukhaonesibwa tawe.

¹²Chikholo che kamaani chakoyaanile, ne liyoka nga lioola lie nyanja, lundi nga bibuli bie kameechi.

¹³Chikholo chiicha nga bibuli bie kameechi, ne kakhali Wele acha khuchirafwira mala chicha khumwilukha chibe sinaao, chiicha khutamuukha nga kamatere khu bikulu ebweeni we mbeo, ne nga likhuuchi ebweeni we sisifuusia.

¹⁴Lola, mu siise sie ekolooba bareera buuri! Ne bukhaasia tawe aba siindu mbao, sino nisio sitonyi siabo babakhwiba efwe, ne lundi nikwo kumuruuru kwabo babakhuyaaya.