Read lubukusu Isa. 18 Bible Online

Isa. 18 - lubukusu bible

Isa. 18

¹ Engelekha we chinjichi cha Esopia, sibala siliio niio buyoka bwe chindaa buuliilikha.

²Barumwa bamaanga mu sibala sienesio bekhela mu luuchi lwa Naili mu maaro ke bisele. Enywe barume kobola engo khangu! Kobosia burume mu sibala sienywe sisiakabukhanisibwamo ne chinjichi, khu kholo yenywe eye kamaani lundi eye bunyali khu baandu benywe baleeyi lundi bamiliiu. Ba bariisia babaandu mu sibala sioosi.

³Enywe mweesi bamenywa be limala, enywe mumenyile khu sibala, simanyisio nga siikharerwe khu ngulu! Nga ekhoombi ne ekhape rekeeresia.

⁴Wele Omunyali Owa Bioosi amboolela ali, “Ese nendi mwikulu, ndalola asi kalaa nga luume ne lwamanga mu silo sie luluuya, mu siise sie likesa nga liliteleela lie kumuumu kumurafu kwe ndaalo.

⁵Kimisabibu ne kikhabutwa tawe, nga bimuli bioosi ne bikwile, mala kimisabibu kilikho kiroba, omusiku alibunia Baesopia kalaa busa nga kumubano ne kukhala chisakia che kimisabibu.

⁶Banamae bafu balilekhelwa chinyuni che mu bikulu ne chisolo. Chinyuni chilababocha mu siimiyu, ne chisolo chilabalia mu munaane.”

⁷Siise silikho siicha nisio Wele Omunyali Owa Bioosi, alinyoola biianwa khukhwama mu sibala sisiakabukhasibwamo ne chinjichi sino, khukhwama ekholo eye kamaani ne bunyali yino, babaandu baleeyi lundi bamiliiu babarisia babaandu mu sibala sioosi. Balecha khu Sikulu sia Sayuni niio Wele Omunyali Owa Bioosi asaayangwa.