Read lubukusu Isa. 19 Bible Online

Isa. 19 - lubukusu bible

Isa. 19

¹ Obuno buli burume khu Misiri. Wele Omunyali Owa Bioosi alikho echa e Misiri, alikho atimila khu lileesi litima khangu. Bifwaani bia Misiri biterema ebweeni wewe, ne bunyindaafu bwe babaandu ba Misiri bwaweele.

²Wele Omunyali Owa Bioosi aboola ali, “Ndasolosia liie mu Misiri mala ngalukhasie wandaaye apane ne wandaaye, omundu apane nende niye apakana naye, chingoba chimboofu chilapana buli ndala ne luluundi, ne babaami ba babiilana balapana khubeela bubwami.

³Mala ndikho nja khwonakaka lirekekha lie Bamisiri ne khukhwonaka silukuluku siabwe. Balareeba bifwaani biabwe ne bafumu babayeete, ne balacha mala bareebe bafumu ne bamakoombe khubakaambila.

⁴Ndara Bamisiri khu mwami omubi lundi omurafu olabamiia. Ese Wele Omunyali Owa Bioosi nalomile.”

⁵Ne kameechi ke mu luuchi lwa Naili kalaboomba, mala luteenye kalaa.

⁶Kamakhono ke luluuchi kalaunya, ne chisakia cha Naili lwa Misiri chilateenya. Bisele ne kamaliki bilaniaala mala bibole.

⁷Ne bimiichwa bioosi biili khu sikiingi sia Naili bilioma, mala biuchibwe biche biwe.

⁸Buli mundu omenyanga khulwe khuloba ching'eeni mu Naili, alabeelela lukali ne khulila, sikila chindobo chabwe ne chindiimba chabwe se chiliba ne bukhala tawe.

⁹Abo banabanga chingubo cha katani baliesing'oong'a, ne banabi be fwamba ewaanga.

¹⁰Abo baali chinjeko che sibala, balifuniakakwa, ne bakholi be kimilimo baruungwa baleunamila.

¹¹Babemeelesi be lukoba lwa Soani bali basilu! Bakesi ba Misiri baboola likaambila lie siyingwa. Banyala khuboolela omwami bariena bali, efwe khuli bakobola mu bweyaangu bwe basomi ne babaami?

¹²Omwami owa Misiri, bakambi bowo bakesi chana abo bali waena? Lekha bakhuboolele niko Wele Omunyali Owa Bioosi we banamae arekeekhe khulwa Misiri.

¹³Babaana be babaami ba Soani ne Memufisi bali basilu. Benyekha khurangirira sibala ne kakhali basitimisie.

¹⁴Wele Omunyali Owa Bioosi abakholile baboole likaambila lie likoyania. Khwako, Misiri sikhola buli sisiindu bubi, lundi bataalitaala nga omumeesi namiukha mu marusio kewe omwene.

¹⁵Se aliio omundu yesi yesi mu Misiri, omuiinda namwe omutaambi, omurie namwe okhamanyikhaane onyala waana buyeeti tawe.

¹⁶Siise silikho siicha babaandu ba Misiri bacha khuba busa baari nga bakhasi. Baliterema mu buri bukali nga ne balibona bali Wele Omunyali Owa Bioosi owe bunyali okeseleele kumukhono kwewe khubaukuuma.

¹⁷Babaandu ba Misiri baliria Yuda buli siise ne bakhebusibwa kamabi niko Wele Omunyali Owa Bioosi we banamae abarekekhele nibo.

¹⁸Nga siise esio ne siliola, lulomo lwe Baeburania lulilomwalomwa mu ngoba chimboofu chiraano che Bamisiri. Babaandu ebweeneyo baliechuba mu lisina lia Wele Omunyali Owa Bioosi. Lukoba lulala khwicho balilulanga bali, “Lukoba luboofu lwe Nyanja”

¹⁹Nga siise esio ne siliola, elibao alutare khu lisina lia Wele Omunyali Owa Bioosi mu sibala sia Misiri, ne enjeko eye libaale yareebwa alubeka Khulwa Wele Omunyali Owa Bioosi elwakha lwa Misiri.

²⁰Bilibao bimanyisio bie khubao khwa Wele Omunyali Owa Bioosi mu Misiri. Nga babaandu ne baliba na bakuluumisibwa ebweeneyo mala balilile Wele Omunyali Owa Bioosi abayeete, alibarumira Omuonia abaonie.

²¹Ne Wele Omunyali Owa Bioosi aliebuula omwene khu baandu ba Misiri ne balimufukiilila ne khumusaaya mala bamureerere bie mbosio ne biianwa. Balimusuubisia lukali ne khukhola niko bamusuubisie.

²²Wele Omunyali Owa Bioosi aliukuuma Bamisiri, ne lundi alibaonia. Balimukobolela mala aliulila kamasaba kabwe mala abaonie.

²³Nga siise esio ne silioola, kulibao kumuyila kumuboofu akari wa Misiri ne Ashuru, babaandu be bibala bibili ebio balicha eyi neyi akari wabio mala chikholo chibili echo chilisaayila alala.

²⁴Nga siise esio ne silioola Isiraeli sililekhaana ne Misiri ne Ashuru, mala chikholo chitaru chino chiliba ekhabi khu sibala sioosi.

²⁵Wele Omunyali Owa Bioosi alibabiita chikhabi naboola ali, “Baandu base Misiri ndamubiita chikhabi, baandu base Ashuru enywe nibo nabuumba ndamubiita chikhabi, ne baandu base Isiraeli enywe nibo narobora, ndamubiita chikhabi.”