Read lubukusu Isa. 2 Bible Online

Isa. 2 - lubukusu bible

Isa. 2

¹Buno nibwo burume nibwo Wele aelesia omung'oosi Isaya okhwa Amozi abona khu Yuda ne Yerusalemu.

²Mundaalo chichiicha, sikulu sie Lukaangu lwa Wele Omunyali Owa Bioosi, siliba sileeyi mu bikulu bioosi, Silisutwa sibe angaaki we bikulu bioosi, ne chikholo choosi chilisiichakho.

³Babaandu bakali baliicha mala balome bali, “Yiicha khuche khu sikulu sia Wele Omunyali Owa Bioosi[1], mu Lukaangu lwa Wele owa Yakobo. Nio akhwekesie efwe chingila chewe, lundi nio khukeende mungila chewe.” Sikila kamekisio ka Wele Omunyali Owa Bioosi kama Yerusalemu ne khukhwama Sayuni alomaloma khu baandu bewe,

⁴ aling'oona kamakhuwa ke chikholo, mala alimala kimisaango kie chikholo chingali, ne chimbalu chabwe, balichikaluukhasia chibe chimbako, ne kamafumo kabwe kabe chingeso chekhukhalisilia. Sibala se silibanulila sibala sisiindi embalu tawe, namwe se silieyika ke liie lundi tawe.

⁵Ee enju eya Yakobo, Yiicha, khukeende mu buwaanga bwa Wele Omunyali Owa Bioosi.

⁶Ee Wele, ewe walobile babaandu bowo, be nju eya Yakobo, Sikila beechula bulakusi khukhwama ebukwe, ne bafumu be bubeeyi nga Bafilisiti, lundi basifukiilisiana ne bakeni.

⁷Sibala siabwe siechulamo efwesa ne sahabu, ne buiinda bwabwe buli bukali, Sibala siabwe siechulamo chifarasi, ne kamakaari kabwe ke liie kali kamakali.

⁸Sibala siabwe siechulamo bifwaani, besaaya kimilimo kie kamakhono kabwe, khu niko babeene bakhola ne chinjala chabwe.

⁹Buli sia mulala akhaambwe chisoni, Wele Omunyali Owa Bioosi, okhababeela tawe!

¹⁰ Yingila mu mbangaachi che chinyaanda, mala mwikise asi, khukhwama khu lirima lia Wele Omunyali Owa Bioosi, ne khukhwama khu luyali lwe bubwami bwewe.

¹¹Ekibonio yo mundu ekhekhisibwe, ne khukhwilola khwe babaandu khuliboombisibwa, Ne Wele Omunyali Owa Bioosi yeng'ene niye oliebwa luyali mu ndaalo eyo.

¹²Sikila Wele Omunyali Owa Bioosi owe banamae ali ne ndaalo, khu babelola ne babebonia, siosi siosi silieniinia siliikhisibwa,

¹³khu mirongooro kimitarakwa kia Lebanoni, kimileeyi lukali, khu mikhoonge kimiboofu kia Baasha,

¹⁴khu bikulu bileeyi bioosi, ne khungulu chindeeyi choosi,

¹⁵khu buli endeleelwa endeeyi, ne khu buli lisiisi lisire,

¹⁶khu buli meeli chosi cha Tarishishi, ne khu buli chimeeli chosi chichakholwa bulayi,

¹⁷ne khukhwebonia khwo mundu, ne khukhwilola khwe babaandu khuliboombisibwa, Wele Omunyali Owa Bioosi yeng'ene niye olinyoola luyali mu ndaalo ng'eneyo,

¹⁸ne bifwaani biliwelao elala.

¹⁹Ne babaandu baliekisa mu mabina ke mu nyanda, ne mu maloo khukhwilukha liriisia lia Wele Omunyali Owa Bioosi ne khu luyali lwe bubwami bwewe, nga nalinyokha khuteremia sibala.

²⁰Khu ndaalo eyo babaandu balimwaata bifwaani biabwe bie efwesa ne sahabu, nibio beng'oonela babeene khubisaaya. Balibimwaatila chifukho ne wambuto.

²¹Baliekisa mu mabina ke chinyaanda, ne munjafwa che kamabaale kamaleeyi, khukhwilukha liriisia lia Wele Omunyali Owa Bioosi, ne khukhwama khu luyali lwe bubwami bwewe, nga ne alinyokha khuteremia sibala.

²²Lekha khukhweyikina omundu, oeela kumuuya busa. Ali nabukhala siina?