Read lubukusu Isa. 21 Bible Online

Isa. 21 - lubukusu bible

Isa. 21

¹Burume khuloondekhana ne Babiloni Nga bibifusia bie Nekebu biama mu siangalaamwe khukhwama mu sibala siriisia lukali.

²Nekesiibwe kamalola kamaandalafu, kamalola ke khuchaama ne khukhwonaka. Cha Elamu, niina angaaki yibwaakala, Metia, nja khwakamia buchuuni bwewe bwoosi nibwo Babiloni areerire.

³Khwako, mu mubili mwase mwechuule burafu, buchuuni bwandiilile, nga buchuuni bwo mukhasi ne alikho alumwa. Nenaame asi sembulila tawe, lundi nafwiile kumwoyo.

⁴Kumwoyo kwase kuupa, buuri bwandereemie, khukhwilabula nikhwo nekoomba, khwangalukhaanekho khwabeele literema.

⁵Mu malola baala emesa babakala bitambaa bakeni bekhalekho, balikho balia ne khunywa! Oli basiili, likhuwa liecha bali, Yinyokha, bemeelesi, mwirekekhele liie.

⁶Lino nilio Wele Omunyali Owa Bioosi amboleele ali, “Cha, oreo omuliindi, lekha aboole niko alikho abona.

⁷Aaba nabona babaandu ne balikho beecha khu farasi babili babili, ne babaandi khu punda ne khu ngamia, akhoya abalolelela bulayi bwene.”

⁸Nio oyo oliinda alaangilile ali, “Ee mwami wase, ndiinda buli njililili abuundu wase kumuusi ne siilo.”

⁹ Ne lola, balikho becha, batimia, chifarasi babaandu babili babili. Nio omuliindi aloma ali, “Babiloni lwakwiile, lundi lwakwiile, ne bifwaani bioosi bie bawele babwe biarakakiilwe khu liloba.”

¹⁰Ee baandu base Isiraeli, mwauulwa busa nga engaanu, ne kakhali muboolela kamakhuwa kamalayi niko mbuliile, khukhwama khu Wele Omunyali Owa Bioosi, Wele owe banamae, Wele owa Isiraeli.

¹¹Buno buli burume khu Edomu. Omundu mulala alikho anaanga khukhwama e Edomu, “Ee, omuliindi, makhuwa siina ke siilo? Omuliindi, makhuwa siina ke siilo?”

¹²Omuliindi aloma ali, “Busia ne bwilabula, waaba noreeba, reeba, kobola lundi.”

¹³Buno buli burume khu Arebia. Enywe babaandu badedani, babene makaari kali mu kambi eya Arebia, mulakona mu siangalaamwe sia Arebia.

¹⁴Reerera be bulesia kameechi, enywe bamenywa be mu sibala sie Tema. Mwakaanile owilukha ne siakhulia siabwe,

¹⁵Sikila belukha khukhwama khu mbalu, khukhwama khu mbalu niio bachoolile, khukhwama khu buyiingo bubwefuumba ne khukhwama khu burafu bwe liie.

¹⁶Sikila Wele Omunyali Owa Bioosi ambooleele ali, “Mu siise sie kumwiiko mulala khuloondekhana ne khubala khwe kimiiko kio mukholi, luyali lwa Kedari lwoosi luliakama.

¹⁷Abo banamae be buyiingo, nibo bali banyindaafu lukali ba Kedari, batiiti bari nibo balirama. Ese Wele Omunyali Owa Bioosi owa Isiraeli nalomile.”