Read lubukusu Isa. 23 Bible Online

Isa. 23 - lubukusu bible

Isa. 23

¹ Buno buli burume khulwa Tiro. Lila enywe chimeeli cha Tarishishi sikila Tiro lwabunile mbao enju namwe bubwilukhilo tawe khukhwama mu sibala sia Saipurasi kamanyikhane.

²Sila busa, enywe bamenywa bali embi ne nyanja Ee baboofuli ba Sidoni,

³Mwaruma barumwa benywe engelekha we nyanja kamapesa kenywe kaba bibiaamo bia Sihori, likesa lia Naili, enywe mwaba baboofuli be chikholo.

⁴Aambwa chisoni ee Sidoni, sikila enyanja eya lomile, ne chisiba chimboofu che nyanja chiboola chili, “Ese se nalumwakho namwe nasaalakho tawe. Se nakhusiakho babaana basoleeli namwe bakhaana tawe.”

⁵Nga Bamisiri ne bakhanyoole likhuwa, bakhabe mu bubeeleli khu likhuwa lino khu Tiro.

⁶Yambukha Tarishishi, lila enywe bamenywa be khu nyanja.

⁷Oluno lunyala lwaba lukoba luboofu lwe liliekhoya lwa Tiro lulwarakikha khaale ku? Oluno luli lukoba luboofu lulwaruma bamenywa baakwa khuamba bibala bikeni ne khubiamiia ku?

⁸Naanu owarekekha khureera kano koosi khu Tiro, lukoba luboofu lwe bubwami nilwo babaami balwo, baboofuli baaba babaandu be lukoosi lwe angaaki lukali khu sibala ku?

⁹Wele Omunyali Owa Bioosi akhalake. Alurekekha ario khulwe khukhwakamia liliebonia liabwe lie fuma ne khuchangalaasia babaandu babwe be lukoosi khu sibala.

¹⁰Yichula mu sibala nga luluuchi lwa Naili ee mukhaana owa Tarishishi! Se siliio silamukhiingilila lundi tawe.

¹¹Wele Omunyali Owa Bioosi okeselelie kumukhono kwewe khu nyanja, akwisiisie bubwami bukali. Omwami aanile lilaka khu Kanaani, khukhwonaka nibio beyikina.

¹²Mala aloma ali “Solasangaala lundi tawe ee, ewe oupisibwa sibi omukhaana owa Sidoni. Yinyokha, yambukha engelekha Saipurasi, yakhaba ebweeneyo kumuleembe mbayo tawe.”

¹³Lola sibala sia Babiloni! Bano nibo bachana se baba ba Ashuru tawe. Balekha chisaang'i chebwaakala lukoba lwa Tiro, bombakha chindeleelwa chabwe bosia abuundu wabwe babunia lukoba lwa Tiro.

¹⁴Enywe chimeeli cha Tarishishi, kuukuula, Sikila lukoba luboofu nilwo enywe mweyikina lwabunile.

¹⁵Siise silikho siicha nisio Tiro lucha khwibililwa khulwe kimiiko kamakhumi saba, siise sie bulamu bwo mwami. Nga kimiiko ekio ne kiliwa, kaliekholekhana khu Tiro nga kumwenya kwo omueeyi kuboola kuli,

¹⁶“Bukula lituungu, cha mu lukoba luboofu, ewe omueeyi niye bebilila! Yimba bulayi, wimbe kimienya kimikali, Nio babaandu bakhukhebulile lundi!”

¹⁷Nga kimiiko kamakhumi saba ne kiliwa Wele Omunyali Owa Bioosi alikhebulila Tiro mala alilulekhuula lukobole khu bwofuli bwalwo, mala lulikhola bueeyi ne bubwami bwe sibala sioosi.

¹⁸Chirupia nicho lulinyoola khulwe bubwofuli chilireebwa alubeka khulwe khuchiaana khu Wele Omunyali Owa Bioosi. Selulibiikha mwibiikhilo tawe, ne abo basaaya Wele Omunyali Owa Bioosi balirumikhira chirupia chalwo khulwe khukula biakhulia ne chingubo nicho benya.