Read lubukusu Isa. 24 Bible Online

Isa. 24 - lubukusu bible

Isa. 24

¹Wele Omunyali Owa Bioosi alikho acha khwonaka sibala mala asianjukhe busa. Alabarusia khu sibala mala asalanisie babaandu basio.

²Kaliba buli khu mundu, basaayi ne babaandu busa, nasioobi ne babaami babwe, bakuli ne bakusia, babekopia ne babekopa, baiinda ne bataambi.

³Sibala silanjukhwa elala ne khukhwonakwa elala Wele Omunyali Owa Bioosi alomile mala kalaba kario.

⁴Sibala sioma mala siniala, limala lioosi liekelile litekhele, bioombi sibala ne likulu bilikho bibola.

⁵Babaandu banyaalutia sibala sikila khufunaka kamalaka ka Wele ne khufuna endakaano niyo Wele akhola emenye mindali na mindali.

⁶Nono Wele alaangilile silaamo sibe khu sibala. Babaandu basio balikho baruungwa niko bakholile. Khwako bakeekhe busa bari barama.

⁷Kimisabibu kilikho kiniala mala endali elikho etamba, buli mundu owaba nasangaalile luno asulunye,

⁸ne kimienya kie liliekhoya lie kamatuungu ne ching'oma chabwe kiasilile.

⁹Liliimba lie busangaafu bwe khunywa endali mbao, se aliio omundu na mulala owekhoyela echamu yayo lundi tawe.

¹⁰Buli siindu mu lukoba luboofu siakoyaanile ne babaandu bekhomekheele mu chinju chabwe nio omundu akhengilamo tawe.

¹¹Babaandu baapa luyoka mu chingila che mu lukoba sikila endali seliio lundi tawe. Busangaafu bwachiliile elala bwarusiibwe mu sibala.

¹²Lukoba luboofu lwakwile ne bilibwa bialwo biafunaakwe.

¹³Lino nilio licha khukholwa mu buli ekholo, mu limala lioosi liliba nga limaliila lie likesa, niio kimiseituni kibutiilwe kiawa buli khu murongooro, ne chisabibu chimaliilisi ne chibutiilwe.

¹⁴Abo balirama balamu balimba khulwe liliekhoya. Abo bali mumbo baliboola nga Wele Omunyali Owa Bioosi nali omukali,

¹⁵ne abo bali ebukwe balimufumia. Babaandu bamenyile khundulo khwe nyanja balifumia Wele Omunyali Owa Bioosi, Wele owa Isiraeli.

¹⁶Khukhwama mu bibala bie aleeyi bie limala, khulaulila kimienya kie khufumia Isiraeli ekholo enuungi. Ne ese se ndi ne lilieyikina tawe. Ndikho ng'ayilila busa! Sikila bachamani bachiililila khukhunjama ne buchami bwabwe butasa khuba bubi lukali.

¹⁷Buli mundu ndekeeresie! Biliio bibiindu biriisia, kamaloo, ne kimireko kiamulindiilile.

¹⁸Omundu yesi yesi okhaka khukhwibacha khukhwama khu kaarisia, alakwa mu liloo, ne omundu yesi yesi owebacha khukhwama mwiloo alaambwa mu mureko. Efula eye mbembeesi elakwa, mala kumusiingi kwe sibala kulaterema.

¹⁹Sibala silatienukha mala siatikhe ne khukhwasamilila.

²⁰Sibala sisiene silatalitaala busa nga omumeesi, ne khuyeng'aana nga khayu mu fula eye mbembeesi. Bumayaanu bwe sibala bwasisitoela, mala silatechukha sikwe ne sesilenyokha lundi tawe.

²¹Siise silikho siicha nisio Wele Omunyali Owa Bioosi acha khuukuuma bunyali bwe angaaki ne babaami be sibala.

²²Wele acha khubuusia alala babaami, nga baboe mu liloo. Alibakhomekhela mu siboe, nabwila siise sie siiukuumo siabwe ne siola.

²³Kumwesi kulimaliia ne enyanga se likhosia tawe, sikila Wele Omunyali Owa Bioosi we banamae aliba omwami. Aliamiia mu Yerusalemu khu sikulu sia Sayuni, mala barangilisi be babaandu balibona luyali lwewe.