Read lubukusu Isa. 25 Bible Online

Isa. 25 - lubukusu bible

Isa. 25

¹Wele Omunyali Owa Bioosi, oli Wele wase Ese ndakhukoosia ne khufumia lisina liowo, Ewe wakhola bibiindu bie khuukia, Wakhola mu busuubili lirekekha nilio wakhola khaale.

²Ewe watechula chingoba chekela bibuuri bie kamaumbu, mala wonaka kamasiisi kacho, Kamachipi niko basiku befwe bombakha karuriireo elala.

³Babaandu be chikholo che bunyali balakhufumia ewe, ewe olaribwa mu ngoba che chikholo chindafu.

⁴Bataambi ne bakhali ne buyeeti tawe belukhile niio oli, mala balindwe bulayi mu siise sie butinyu. Ewe olabaelesia niio beyikama embembeesi, ne sisiniini sie khukhwikhiinga kumuumu. Barafu babi bebwaakala nga embembeesi eye kumunaane,

⁵nga bukhafu mu sibala sisioomu. Ne ewe Wele Omunyali Owa Bioosi wasisiisie luyoka lwe baakwa, nga bukhafu mu siniini sie lifuumbi, khwako kumwenya kwe barafu kwemeekhwe.

⁶Khu sikulu Sayuni khuno Wele Omunyali Owa Bioosi aling'oonela chikholo che sibala choosi naikara, naikara eye biakhulia bilayi lukali ne ndali endayi.

⁷Abwenao alarusiao lifuumbi lie bubeeleli khangu liliabeleenge khu kholo choosi.

⁸ Omwami WELE alionaka lifwa mindali na mindali. Alieya kamasika sia moni cha buli mundu mala arusieo chisoni nicho babaandu bewe banyoola mu sibala sioosi. Wele Omunyali Owa Bioosi omwene alomile!

⁹Nga lilikholekha, buli mundu aliboola ali, “Ali Wele wefwe! Efwe khwara lisuubila liefwe mu niye mala akhuonia. Ali Wele Omunyali Owa Bioosi! Efwe khwara lisuubila liefwe mu niye mala luno khwasangaalile ne khukhwikhoya sikila akhuonisie.”

¹⁰ Wele Omunyali Owa Bioosi aliliinda Sikulu sia Sayuni, ne kakhali babaandu ba Moabu baliswalakililwa asi, bulayi bwene nga chikhanja ne chiswalakililwa mu siina.

¹¹Balisuta kamakhono kabwe oli balikho bakhaka khusoka, ne kakhali Wele alibachangalasia, nio kamakhono kabwe keleele busa.

¹²Alitechula kamasiisi ke chingoba cha Moabu ne kamasiisi kacho kamaleeyi ne khukamwaata asi mu lipukhuulu.