Read lubukusu Isa. 26 Bible Online

Isa. 26 - lubukusu bible

Isa. 26

¹Endaalo elikho yiicha niyo babaandu balimba kumwenya kuno mu sibala sia Yuda: Lukoba luboofu lwefwe luli lwe kamaani, Wele omwene niye oliindanga kamasiisi kayo!

²Yikula bilibwa bie lukoba luboofu, mala mulekhuule ekholo esuubilwa yingilemo, ekholo niyo babaandu baayo bakholaanga kali kamaluungi.

³Ewe Wele Omunyali Owa Bioosi aana kumuleembe kumwichufu, khwaabo babaliinda likhuwa liowo bulayi, mala bara lilieyikina liabwe mwiwe.

⁴Suubila mu Wele Omunyali Owa Bioosi mindali, buli lwoosi alakhuliinda efwe.

⁵Wekhisie abo ba baaba ne beniinia, onaka chingoba che kamaani nicho bamenyangamo, lundi asindiikhe kamasiisi kaumbukhakiile mu lipukhuulu.

⁶Abo babamiinwa luno balukeendakho, mala baluswalakilila.

⁷Wele Omunyali Owa Bioosi ewe weeya engila yamiliia khulwe babaandu balayi. Kumuyila nikwo bachilakho kwayasibwa.

⁸Efwe khuloonda lilienya liowo, mala khura lilieyikina liefwe mwiwe. Ewe weng'ene niye efwe khwekoomba.

⁹Mu silo ndakhwekoomba ewe ne kumwoyo kwase kwoosi, nga nolikhalakila sibala ne babaandu basio, boosi balieyika bung'ali buli siina.

¹⁰Ewe wakhaba noli omulayi babaandu bamayaanu se beyika khukhola kali kamaluungi tawe. Akhaba ano mu sibala sie babaandu baluungi, basiikhola busa kamakhiikha, baloba khumanya bunyali bwowo.

¹¹ Basiku bowo se bamanyile bali olibauukuuma tawe. Wele Omunyali Owa Bioosi baambie chisoni mala balekhe baumie, mumunaanio nikwo ewe warekekha. Bekesie nga ewe ne wasiima babaandu bowo.

¹²Wele Omunyali Owa Bioosi ewe olakhuelesia kimiaandu, buli siindu nisio khunyoolanga sili likobosio nilio ewe okhola.

¹³Wele Omunyali Owa Bioosi, Wele wefwe khwaminwa ne babaandi, ne kakhali ewe weng'ene oli Wele Omunyali Owa Bioosi Wele wefwe.

¹⁴Luno bali bafu ne se balilamukha lundi tawe. Bimakoombe biabwe se bililamukha tawe, sikila ewe wabaukuumile ne khubabunia. Se aliio na mulala olibakhebulila lundi tawe.

¹⁵Wele Omunyali Owa Bioosi ewe wabalaayisie ekholo yefwe, wabalaayisie sibala siefwe buli lubeka, mala lino liakhurereere ewe lukoosi.

¹⁶Ewe Wele Omunyali Owa Bioosi waukuuma babaandu bowo, ne mu buchuuni burafu bakhusaba ewe.

¹⁷Ewe Wele Omunyali Owa Bioosi wakhukholile efwe khulile, nga omukhasi olumwa nalila mu buchuuni,

¹⁸efwe khwaba mu buchuuni bwe bubeeleli burafu, mala se khwasaala siindu tawe, se khwarererakho sibala siefwe bukhili tawe, se khwakholakho siosi tawe.

¹⁹Babaandu befwe babafwa abo balimenya lundi, kimibili kiabwe kikhanyoole bulamu lundi. Abo boosi babakona mu biliindwa biabwe, balinyokha mala bembe khulwe liliekhoya. Nga luume lung'enang'ena luosia liloba, nio akhaba Wele Omunyali Owa Bioosi yesi alilamusia abo babafwa khaale.

²⁰Baandu base, yingila munju chenywe mala mwikaleo. Yikukhuulila khulwe siise sikeekhe nabwila lirima lia Wele ne liwa.

²¹Wele Omunyali Owa Bioosi alikho echa khukhwama abuundu wewe niio amenyanga khuukuuma babaandu be sibala khulwe bumayaanu bwabwe. Bubwiri bwe mu bwikisi bubwakholwa mu sibala bulifuunulwa, ne sibala se silikisa lundi abo babeerwa tawe.