Read lubukusu Isa. 27 Bible Online

Isa. 27 - lubukusu bible

Isa. 27

¹ Khu ndaalo eyo Wele Omunyali Owa Bioosi alirumikhira embalu yewe eye kamaani ne khukhwira Lefiatani okwo kukwikoniola ne khukhwibororaka ne khukhwira kusolo kukwamenya mu nyanja.

²Khu ndaalo eyo, Wele Omunyali Owa Bioosi aliloma ali, “Yiimba lulwimbo khu mukuunda kwase kumulayi kwe kimisabibu,

³Ese Wele Omunyali Owa Bioosi ndi omuliindi wakwo, Nguchukhililanga kameechi buli siise. Nio omundu akhakwonaka tawe. Nguliinda siilo ne kumuusi.

⁴Luno sendi ne lirima tawe. Kaaba bali kamawa ne mbululwe bilimo nibio khupana nabio, ndi bionakaka, ndibiosia bioosi alala.

⁵Ne basiku be babaandu base baaba ne benya buliindi bwase, lekha bakhole kumuleembe ne nase, ee, lekha bakhole kumuleembe ne nase.”

⁶Mu ndaalo chichiicha babaandu ba Isiraeli, be lisaaye lia Yakobo, balikhisia chiisi nga kumurongooro, ne kumulikha ne khukhwama. Sibala silifunikhwa ne kamatuunda kakaama.

⁷Abapile nga aapa abo bababaapa? Namwe bafwiile nga babeeri ne berwa?

⁸Sipiimo khu sipiimo mu mbaambe ewe wapana nabo. Ababukula abayila aleeyi ne khungu endafu khukhwama ebukwe.

⁹Khwako ne bumayaanu bwa Isiraeli bulibeelwa, ne lino liliba lituunda liboofu lie khurusiao bumayaanu, nga nalikhola kamabaale koosi ka alutare, nga kamabaale ke luloongo mala alusie, mbao Ashera namwe bupaani bwa alutare bulirama tawe.

¹⁰Lukoba lwabotookhelesibwa ne kamasiisi lwatechuulwe lwakwile, lwanjukhwe nga sichiimi siikhalimo siindu tawe. Lwekelile kamayilwe ke chikhaafu, niio chiolela ne khukhwaya.

¹¹Chisakia che kimirongooro chomile ne khufunikha bakhasi bachireenya nga chiikhu. Sikila babaandu se bamanyile siindu siosi siosi tawe, khwako Wele owabuumba se alabakholela siisa tawe,

¹²Khu ndaalo eyo Wele Omunyali Owa Bioosi alibuusia babaandu bewe khukhwama khu luuchi Efurati khukhwola khu lwakha lwa Misiri, mulala sia mulala nga omundu naseesa engaanu abisia likhuuchi liruremo.

¹³Nga endaalo eyo ne liola ekhoombi eliipwa, khulaanga Baisiraeli boosi bali mu mbaambe Ashuru ne Misiri bakobole. Balicha mala basaaye Wele Omunyali Owa Bioosi mu Yerusalemu khu sikulu siewe sitakatifu.