Read lubukusu Isa. 28 Bible Online

Isa. 28 - lubukusu bible

Isa. 28

¹Bubwami bwa Isiraeli bwakwile! Luyali lwabwo lulikho lufulafulana nga ekuutwa eye bimuli khu mirwe kie barangirisi balwo bameesi, kimirwe kiabwe kikieniinia kiaakhilwe kamafura kaunya bulayi, ne kakhali balambaalile ao mu bumeesi bwe lifwa.

²Wele Omunyali Owa Bioosi ali no mundu owe kamaani lundi owe bunyali owerekeekhe khubebwaakala, omundu oyo olicha nga embembeesi eye kamaarara, nga efula engali, nga kameechi kamakali kakechuule buli abuundu.

³Liliebonia lie barangirisi bameesi abo, lilaswalakililwa.

⁴Luyali lufulafulana lwe barangirisi babebonia abo lulawao, nga chinduli chinyoaanga khuroba siimiyu ne sili siimbi. Omundu ne achibona, achibuta khangu ne khuchilia abwene ne abwene.

⁵Endaalo elikho yiicha niio Wele Omunyali Owa Bioosi, aliba nga ekuutwa eye luyali, eye bimuli khulwe babaandu bewe balirama.

⁶Aliaana roho we bung'ali khwaabo bakhola kimilimo nga bakhalaki, mala aandalasie kimiooyo kiaabo baliindanga bilibwa bie lukoba luboofu khukhwama khu bwibwaakali.

⁷Akhaba bang'oosi ne basaayi bameelile lukali balikho bataalitaala. Banywele endali engali ne kamalwa bali mu ngoyaani. Bang'oosi bameelile lukali se banyala bamanyilisia kamalola niko Wele abarumira tawe, ne basaayi bosi bameelile lukali ata se banyala bakhalaka chikesi chireerwa khu nibo tawe.

⁸Chimesa nicho bekhalangakho chechuule kamarusio ne se aliio abuundu amiliiu aramire tawe.

⁹Banjelung'unyakho, baloma bali, “Omundu oyo ebaasia ali ekesia naanu? Naanu owenya burume bwewe? Burume bwewe buli bulayi khu baana balekhile khunuuna busa bari!

¹⁰Alakhakanga khukhweyikia enyukuta khu nyukuta ne lunyilili khu lunyilili, lilieyika khu lieyika.”

¹¹ Enywe mwaba ne mukhandekeeresia tawe, aba Wele alarumikhira bakeni balomaloma lulomo lukeni, khumwekisia enywe lilieyika.

¹²Amuelesia enywe mweesi siuluukho ne liioleelesia, ne kakhali enywe mwaloba khu murekeeresia.

¹³Elio nilio likila Wele Omunyali Owa Bioosi ne alikho acha khumwekisia enywe enyukuta khu nyukuta, lunyilili khu lunyilili, lilieyika khu lieyika. Nono, mukhetuye nga mukhaka khukeenda. Mukhapwe, mukharekwe, mala mubukulwe nga baboe.

¹⁴Luno enywe baandu be liliebonia, mumwamiianga mu Yerusalemu muno khu baandu bano, rekeeresia niko Wele Omunyali Owa Bioosi alikho aboola.

¹⁵Enywe mweniinia ne mweboola boola muli mwauliilisiane ne lifwa, lundi mwakholile endakaano ne lsibala sie makoombe. Enywe musuubila muli butinyu bulimulekha enywe nga buliicha, sikila mweyikina bubeeyi ne bubacha khu muliinda.

¹⁶ Luno kano niko Omwami WELE aloma, “Lola, ese ndikho nda mu Sayuni libaale lie kumusiingi lili liaandalafu lundi lie kamaani. Ndara mu nisio libaale lie mukona liaandalafu khu nilio kamakhuwa kano kaandikwa kali, ‘Lisuubila lili ng'ali lili lundi liliefwiilisia.’

¹⁷Bung'ali buliba sikelo sie kumusiingi, ne busuubilwa buliba sikelo sie bubwombakhi.” Efula eye kamaarara elirusiao bubeeyi bwoosi nibwo enywe mweyikina, ne kameechi kamakali kalionaka buliindi bwenywe.

¹⁸Buambaani nibwo mwakhola ne lifwa bularusibwao, ne endakaano yenywe ne sibala si bafu elarusibwao. Nga butinyu bulimunyoola mulikhilwa.

¹⁹Bulibelelela busa khumupa enywe, busia busia, kumutikhinyi khu mutikhinyi. Kalaba khwinywe kumuusi ne silo. Buli burume buyia khukhwama khu Wele buliba sirikhirisio sisiindi!

²⁰Enywe muliba nga omundu mu lusimo okhaka khukona khu sitanda sisiimbi nisio akhanyala khulambisia tawe, ne sisibiimbilo sikeekhe lukali nisio akhanyala ebiimba tawe.

²¹ Wele Omunyali Owa Bioosi alipana nga akhola khu sikulu Peresimu ne mu litooma lia Kibeoni, nio akhole niko enya khukhola, kamakeni busa nga bikholwa biewe ne bibonekha. Alimala kimilimo kiewe, kimilimo kiewe kie liukia.

²²Mukhachekheelela likania nilio ndikho muelesia enywe tawe! Mwaba ne mukhola murio, lilaba liaandalafu lukali khwinywe khukhwilukha. Nauliile likhalaka lio Mwami WELE we banamae khubunia sibala sioosi.

²³Rekeeresia niko ese ndikho mboola, ba ne kamaru murekeeresie niko ese ndikho muboolela.

²⁴Se aliio omulimi ochiilililanga busa khulima busia busia kumukuunda kwewe nakurekekha khumiicha tawe.

²⁵Nga namala khurekekha kumukuunda, abiaala binjari ne piripiri. Amiicha chinyilili che ngano ne shayiri ne khundulo khwe kimikuunda kiewe amiichakho biakhulia bibiindi.

²⁶Amanyile khukhola kimilimo kiewe, sikila Wele amwekesia.

²⁷Sarumikhiranga kumwiini kumusiro khuula bumiicho bwa binjari namwe piripiri, ne kakhali arumikhira kumwiini kumwangu.

²⁸Seonaka engaanu khulwe khuula khubi tawe, lundi amanyile khukiula khulwe khubisiliakho ekorokocho, mala se arakaka bumiicho tawe.

²⁹Limanya lino lioosi liama khu Wele Omunyali Owa Bioosi. Kamarekekha niko Wele akhola kali ke limanya, mala buli lwoosi kekholekhanga.