Read lubukusu Isa. 29 Bible Online

Isa. 29 - lubukusu bible

Isa. 29

¹Alutare eya Wele, Yerusalemu lulwene lwabunile! Lukoba luboofu nilwo Daudi amenyamo lwakwile. Lekha kumwiiko kukundi, namwe kibili kiche mala kibire, ne naikara chakio ne biise biakio

²mala Wele alareera kamabi khu lukoba luboofu lulaangwa luli, “Alutare eya Wele.” Liliila ne liliesasaara bilabaao mala lukoba lwoosi lulaba nga alutare eyichuulekho kamafuki

³Wele alibwaakala lukoba luboofu alubotookhelele mala alwekhiine.

⁴Yerusalemu luliba nga simakoombe sikhola kamaani khulomalomela asi mu liloba ne khunyelesia khamilo khukhwama mu lipukhuulu.

⁵Yerusalemu, bakeni boosi babakhwibwaakala baliuchwa busa nga lutamuusi, ne banamae babwe barisia balisalanila busa nga kamatere.

⁶Ao ne nao, ne khulekha khumanya tawe. Wele Omunyali Owa Bioosi alimureesia enywe khukhwama khufula eye mbembeesi endafu, ne literema lie sibala. Aliruma sisifuusia ne kumulilo kukwerika.

⁷Nio banamae boosi be chikholo chilikho ne chibwaakala lukoba luboofu lwe alutare eya Wele, bulwaani bwabwe boosi ne bibiindu biabio, buli siindu siliwao busa nga kamarooro, nga sisiindu nisio omundu ebaasiisie mu silo.

⁸Chikholo choosi chibusiane alala khukhwibwaakala Yerusalemu chiliba nga omundu owe njala, oroora ali alikho alia ne oli enyokha ali njala, namwe nga omundu owe bulesia oroora ali alikho anywa kameechi ne oli enyokha bulesia bwamukhayile.

⁹Chiililila khuuba basilu! Chiililila khubofula! Meela ne seli khulwe ndali yosi yosi tawe! Meela busa ne yakhaba ne mukhanywelekho lilwa tawe.

¹⁰ Sikila Wele Omunyali Owa Bioosi amuelesie roho we liilo likali, mala ekaasie chimoni chenywe, enywe bang'oosi ne khubiimba kimirwe kienywe, baloli.

¹¹Ne kamalola kano koosi khwinywe kaliba nga burume nibwo baandiike mu sitabu nisio bafuuniikhe khulwe khusirakho kumuuri. Mwaba ne mu siyilila omundu yesi yesi onyala asooma ne mumuboolela muli “Soma kano,” alaloma ali, “Senyala khusisoma tawe, sikila siafuuniikhwe khulwe kumuuri.”

¹²Ne baelesia omundu okhamanyile khusoma tawe, ne baloma bali, “Soma kano,” alaloma ali, “Senyala khusoma tawe.”

¹³ Wele Omunyali Owa Bioosi aboola ali, “Babaandu bano baboolanga bali basaayanga ese, ne kakhali kamakhuwa kabwe kali ka busa, ne kimiooyo kiabwe kili abuundu aandi. Edini yabwe eli busa siindumo tawe, ne kakhali kali kamalaka ne kimiima kie babaandu babwe nikio batiila busa emurwe.

¹⁴ Khwako ese ndabarangarasia ne siikhupo silala sia silala nisio bakherekekhera tawe. Abo bali bakesi balakaluukhana bekele basilu ne bukesi bwabwe bwoosi bulaba bwa busa.”

¹⁵Abo bakhaka khukisa Wele Omunyali Owa Bioosi lirekekha liabwe bali ne silaamo. Bakholela lirekekha liabwe mu bwikisi mala bebaasia bali se aliio olababona tawe, namwe omanyile niko bakhola tawe.

¹⁶ Enywe mukaluukhasia buli siindu mufumalikha. Siina siboofu, khukhila sisiindi, omubuumbi namwe liloba? Sisiindu nisio omundu abuumbile sinyala siamuboolela sili, “Ewe se wambuumba tawe?” Namwe sinyala siamuboolela sili, “Somanyile nisio olikho okhola tawe?”

¹⁷Nga lusimo luboola luli, enyuma we siise sitiiti kumusiru kulekela kumukuunda, ne kumukuunda kulekela kumusiru.

¹⁸Nga endaalo eyo neliola, bamiinyi baliulila sitabu ne sisomwa lukali, ne babofu ba baamenya mu siilima balimoka ne khubona.

¹⁹Bataambi ne babeboombia balinyoola busangaafu nibwo Wele Omunyali Owa Bioosi Omutakatifu, Wele owa Isiraeli aananga.

²⁰Sikila bamayaanu bakhabunisibwe, balekelesia bakhatambeo, Ne abo boosi baberekekhera kamamayaanu balafwa.

²¹Wele alibunia abo babeelanga babaandi, abo bakhiingililanga sinyaasio sie babi, ne nabo balomanga bubeeyi khukhiingilila babaandu, basuubilwa bakhanyoola bung'ali bwabwe tawe.

²²Nio luno Wele Omunyali Owa Bioosi, Wele owa Isiraeli owareesia Aburahamu khukhwama mu butinyu aboola ali, “Baandu base, enywe se mulaambwa chisoni lundi tawe, ne se mulabiililwa mu moni lundi khulwe khuambwa chisoni tawe.

²³Nga ne mukhabone babaana nibo khamuelesie, nono mukhafukiilile muli ese ndi Omutakatifu owa Isiraeli. Nio mulimanya muli ese ndi Wele Omutakatifu owa Isiraeli. Mulimba ese luyali mala mwime mu buri khwise.

²⁴Babaandu basilu balieyika khumanyilisia ne abo babanala khukhwelung'unya busiele, balisangaalila khukhwekisibwa.”