Read lubukusu Isa. 3 Bible Online

Isa. 3 - lubukusu bible

Isa. 3

¹Nono lola Omwami, Wele Omunyali Owa Bioosi owe banamae, alikho arusia mu Yerusalemu ne mu Yuda, buli siindu ne buli mundu niyo banyoolangakho buyeeti. Biakhulia bioosi nibio balichanga. Ne kameechi koosi niko banywechanga.

²Babaandu be kamaani ne banamae, bakhalaki ne bang'oosi, balakusi ne basaakhulu,

³bakhulu be banamae kamakhumi karaano, ne babaandu be lukoosi, bakeleki be babaandu bamanyile kamaya lukali, ne balakusi bakesikesi.

⁴Wele Omunyali Owa Bioosi alifukiilila basoleeli babe babaami babwe, ne babaana batiiti balibamiia.

⁵Babaandu bacha khukhupisiana sibi, Baele balabelekeela basaakhulu, ne babaandu bakhali na siosi se baliria be lukoosi tawe.

⁶Omundu alirobora wandaaye, owe munju yabwe mala amuboleele ali, “Ewe olikho ne ngubo, khoobe omwimeelesi wefwe, ne kamakuunda kano kakhabe asi we bubwami bwowo.”

⁷Mu siise esio alibakobosia ne aloma ali, “Se ndaba omuonia wenywe tawe, munju mwase mbamo siakhulia namwe engubo tawe: Se mulakhola mbe omwimeelesi wenywe tawe.”

⁸Yerusalemu lwabunile, ne Yuda yakwile, Sikila lilomaloma ne bikholwa biabwe, bili biibi khu Wele Omunyali Owa Bioosi, Balekelesia khubao khwa Wele Omunyali Owa Bioosi ne luyali lwewe.

⁹Khutamba bung'ali bwabwe mu bukhalaki buba buloli khu nibo, Bakhola bumayaanu simwamu busa nga Sodomu, se babukisakho tawe. Silaamo sibe khu beene, sikila babeene bereerera kamamayaanu.

¹⁰Boolela baluungi oli bulaba bulayi[2] khu nibo. Sikila bakhalie lituunda lie kamalayi kabwe.

¹¹Bamayaanu balaamwe! Baliba mu sibi, sikila kamabi niko bakholela babaandu kalikholekha khu beene.

¹²Babaandu base-babaana bali bakuluumi khu nibo, ne bakhasi babaamiia. Enywe baandu base, babemeelesi benywe bamutiimia, ne bamurusia khungila che bung'ali.

¹³Wele Omunyali Owa Bioosi emile mu bweyaangu bwewe, khukhalakila babaandu bewe.

¹⁴Wele Omunyali Owa Bioosi arakikha bukhalaki khu basaakhulu, ne babaana be babaami be babaandu bewe: “Enywe ninywe mu mwonaka kumukuunda kwe kimisabibu, mala chinju chenywe chechulamo bibiindu nibio mwanuula bataambi.

¹⁵Omwami WELE owe banamae aloma ali, muli na sifuno siina sie khuswalakilila babaandu base, sie khumiinakilisia bataambi?”

¹⁶Wele Omunyali Owa Bioosi aboola ali: “Sikila bakhaana ba Yerusalemu bali ne kukwebonio! Bakeenda basutile kamakosi angaaki, ne khumokamoka chimoni che bueeyi, ne likeenda lie kukwebonio, ne bapania chindeekwe khu bikele biabwe.

¹⁷Khwako Wele acha khuelesia bibioole bakhaana be Yerusalemu, Wele Omunyali Owa Bioosi, acha khwekesia sichula siabwe.”

¹⁸Endaalo elikho yiicha niyo omwami acha khurusia khu bakhasi be mu Yerusalemu buli sisiindu nisio beboneseliangakho lukali. Bie khukhwesaa nga chinaalo nende nibio befwaranga mu kheng'engele, ne bibiuuma bie mu makosi bitambaa bie murwe.

¹⁹Bitati, bikamata, bitambaa bie mu mukhono. Alarusiao lububi lwabwe.

²⁰Ne chikofio chabwe, chipangili, ne chikhoba che munda, chichupa che kamafura ke khukwiakha kaunya bulayi, ne chiriisi.

²¹Kamamili niko bafwara khu njala chabwe, ne mu moolu mwabwe.

²²Chikutuusi chabwe chingwalaafu, chingubo chindeeyi, ne chingabulila ne chindayi,

²³chingubo chichekesia, chingubo cha katani, bileemba, ne chingubo che lububi.

²⁴Mu bwangu bwe kamafura ke khukhwiakha kaunya bulayi balaunya bubi. Mu bwangu bwe chikhoba che munda chingwalaafu, balibooela kumukoye. Mu bwangu bwe khuba ne lichuune lilayi balaba ne bibioole. Mu bwangu bwe chingubo chingwalaafu, balafwara bitasi, lukoondo lwabwe lulayi lulakaluukhana lwikele chisoni!

²⁵Baseecha benywe bakheerwe ne mbalu. Ne be kamaani benywe bakhafwiile mwiie.

²⁶Bilibwa bie lukoba bilisooma ne khulila, ne lukoba lulwene luliba nga omukhasi owikhaale asi khu sibala sichula.