Read lubukusu Isa. 30 Bible Online

Isa. 30 - lubukusu bible

Isa. 30

¹Wele Omunyali Owa Bioosi alomile ali, “Bali ne silaamo babaana babakholela sileka. Bakhola lirekekha liabwe likhali liliase tawe, baali ne liambaana likhali lie lilienya liase tawe, mala batasa bumayaanu khu bumayaanu.

²Bacha Misiri khuyiima buyeeti, ne bakhareebire likaambila liase tawe. Benya Misiri sibaliinde, nio basuubila mu mwami owa Misiri.

³Ne khwako buyeeti bwo mwami owa Misiri bulekela chisoni, ne buliindi mu siniini sia Misiri echangalaalo.

⁴Akhaba barumwa babwe, ne bolile khale mu ngoba cha Misiri cha Soani ne Hane,

⁵babaandu ba Yuda bakhesonie bali buli lwoosi basuubilanga ekholo ekhasuubilwa tawe, ekholo ekhabayeeta tawe ne benya buyeeti.”

⁶Obuno buli burume bwa Wele khu solo eye mu sichiimi sie bunaswa: Barumwa bacha chingeendo chibira mu sibala sie busiku, niio chitalang'i ne niio chindemu che bufwisi chili ne yabeebe. Basutila khu punda ne khu ngamia biianwa bie bukusi bwe angaaki lukali, khuyilila ekholo ekhanyala yabaelesia buyeeti bwosi bwosi tawe.

⁷Buyeeti nibwo Misiri siaananga buli bwa busa. Khwako nasilangile ndi, “Kunaniinga kukheera tawe.”

⁸Wele amboolela ese, khuandika mu sitabu nga babaandu ne bali, nio kabeo kamaandiko kakhawao tawe, nga bali bamayaanu.

⁹Buli lwosi bali bareengu khu Wele, buli lwosi bali babea, buli lwosi baloba khurekeeresia kamekisio ka Wele Omunyali Owa Bioosi.

¹⁰Baboolela bang'oosi basile busa. Baboola bali, “Mukhakhuboolela ka ng'ali tawe. Khemukhuboolele niko efwe khwenya khuulile, lekha efwe khuulile kamakhuwa ke bubeeyi busa.

¹¹Khurure ebweeni, mala okhakhiingilila chingila chefwe tawe. Efwe se khunyala khuulila ko mutakatifu wowo Wele owa Isiraeli tawe.”

¹²Khwako kano niko Omutakatifu owa Isiraeli alikho aboola, “Sikila enywe mulekelesia likhuwa lino, musuubila mukhupia sibi ne bumayaanu ne khubieyikina.

¹³Khwako bumayaanu buno bukhabe khwinywe. Nga lulwafwa luuli mwisiisi lileeyi liikeyile, liili siimbi khukwa, nilio khukwa khwayo khwicha khangu busa.

¹⁴Mulatikha busa nga enyuungu eye liloba eyatikhaake bubi, mala se sinyoolekhao sicho sibalaayi, sie khukhwanjalilakho kumulilo tawe, namwe watayilakho kameechi khukhwama mu sebele tawe.”

¹⁵Omwami WELE, Omutakatifu owa Isiraeli aboolela babaandu ali, “Mukhwekanila ne khuulukha mulanyoola buonia. Mubusisi ne busuubili bikhabe kamaani kenywe.” Ne mwaloba khukhola!

¹⁶Nekhali enywe murekekha khukhwilukha khukhwama khu basiku benywe, mu khutimia chifarasi chitima khangu. Ne enywe muli ng'ali khukhwikoba lili nilio mukhoyeele mukhole! Enywe mwibaasia muli chifarasi chenywe chitima khangu lukali, ne abo bamutimania balaba khangu khu mukhila enywe!

¹⁷Enywe eelefu ndala mulelukha nga mubona omusiku wenywe mulala, ne basiku baraano banyala busa khumukhola enywe mweesi mwilukhe. Se siliio sisiindu siosi siosi silarama sie banamae benywe, nekhali lusaala lwe bendera yenywe lwong'ene nilwo lularama khu sikulu khungaaki!

¹⁸Khwako Wele Omunyali Owa Bioosi alindiliile khumukholela enywe siisa. Werekekhe khumukholela siisa sikila buli lwosi akholanga kali ng'ali. Bali nekhabi abo baara lisuubila liabwe mu Wele Omunyali Owa Bioosi.

¹⁹Enywe babaandu mumenyile Yerusalemu se mulalila lundi tawe. Wele Omunyali Owa Bioosi ali ne siisa ne mumulilila niye khukhwenya buyeeti, alamukholela.

²⁰Wele Omunyali Owa Bioosi alamukhola mu bire mu biise biiandalafu ne kakhali omwene alabao khumwekesia, mala se mulamwima lundi tawe.

²¹Mwaba ne muyiiyayiiya khu ngila lubeka luseecha namwe lukhasi mulaulila kumumilo kwewe enyuma wenywe ne kuboola kuli, “Engila eli ano. Kendelakho.”

²²Mulabukula bifwaani bienywe bibiabakhwa ne efwesa ne bibiafuunukhwa esahabu mala mulabimwaata eyo nga binyaalu, ne mulayokela muli, “Ndure mu moni!”

²³Buli lwoosi nga mumiicha bumiicho bwenywe Wele Omunyali Owa Bioosi alaruma efula ebukhole bichoe mala alamukhola mube ne likesa lilayi, ne chikhaafu chenywe chilaba ne kamayilwe kamakali.

²⁴Chieeyi ne chipunda chilimanga kimikuunda kienywe chilalia bunyaasi ne kimilele kimilayi.

²⁵Khu ndaalo niyo chingoba che basiku benywe chilitiilwa ne babaandu bacho berwe, chinjichi chilikha khukhwama mu buli sikulu ne lukulu.

²⁶Kumwesi kulikhosia nga enyanga, ne enyanga elikhosia khukhwola saba khukhila nga ebechanga busiele, nga buwaanga bwe chindaalo saba ne bukhosia mu ndala. Kano kalikholekha nga Wele Omunyali Owa Bioosi naliba ne alikho asilikha kamakoonjo ke babaandu bewe niko abapa.

²⁷Lola lisina lia Wele Omunyali Owa Bioosi liama aleeyi, liburukha lirima ne liliisi likali. Kumunwa kwewe kwechuule lirima liewe, ne kamakhuwa kewe kali nga kumulilo kukwosia.

²⁸Kumuuya kwewe kuli nga luluuchi lulwichuule, lwolile khu sikiingi, khukabukhania chikholo ne sichichungo sie libunia, ne khuchirakho sisiindu sibakhiingilila be khubatimia.

²⁹Ne kakhali enywe, babaandu ba Wele mulisangaala mala mwimbe nga mukholanga silo sia naikara endakatifu. Muliba basangaafu nga abo bakeendela khu mienya ne khu khuupa kimilele khu ngila yabwe ne bacha mu Lukaangu lwa Wele Omunyali Owa Bioosi, Omuliindi owa Isiraeli.

³⁰Wele Omunyali Owa Bioosi alikhola buli mundu aulile kumumilo kwewe kwe saambo eye bubwami mala eulile kamaani ke lirima liewe. Bilabaao lilirika lie kumulilo, lirundukha lie kamafuumbi, kamaarara, ne fula eye luucho.

³¹Baashuru baliterema nga baliulila kumumilo kwa Wele Omunyali Owa Bioosi mala baulile kamaani ke siikhupo siewe.

³²Nga Wele Omunyali Owa Bioosi nachiililila khukhupa babaandu bewe balichila alala ne kimienya kie ching'oma ne kamatuungu. Wele omwene alipana ne Baashuru.

³³Khaale abuundu abao arekekhwa niio kumulilo kumukali kulioselia omwami owa Ashuru. Abuundu abwene ali liloo liboofu lundi libalaayi. Kumulilo kuliyo ne chiikhu chingali. Wele Omunyali Owa Bioosi akhaele kumuuya kwe njaso kuambisie.