Read lubukusu Isa. 31 Bible Online

Isa. 31 - lubukusu bible

Isa. 31

¹Bali ne butinyu abo bacha e Misiri khuyiima buyeeti, ne khukhweyika chifarasi, Babeyikina kamakaari ke banamae sikila bali bakali, ne mu farasi sikila chili ne kamaani lukali, Ne kakhali se beyikina Wele Omunyali Owa Bioosi Omutakatifu owa Isiraeli tawe, namwe bamureeba niye buyeeti tawe.

²Amanyile nisio alikho akhola! Aruma butinyu. Akholanga ke liriisia liewe khunyaasia babaandu bamayaanu, ne nabo ba babaliindanga.

³Bamisiri bali babaandu busa, se bali Wele tawe, ne chifarasi chabwe chili chisaang'i busa se chili roho tawe. Nga Wele Omunyali Owa Bioosi nakololosia kumukhono kwewe, omuyeeti akhetuye ne niye bayeeta akwe asi, mala boombi balifwila alala.

⁴Wele Omunyali Owa Bioosi amboolela ali, “Bakhaba babaayi ne baapa lulwang'a ne khuyokela bariena se banyala barisia etalang'i yelukha, yalekha sisiaayo nisio yirire tawe. Kali kario se siliio sinyala siakhiingilila ese, Wele Omunyali Owa Bioosi ndekhe khuliinda sikulu Sayuni tawe.

⁵Bulayi bwene nga enyuni ne bechanga khu siswi siayo, ne liinda kamaana kayo, nio ese Wele Omunyali Owa Bioosi ndikhiingilila Yerusalemu ne khu luliinda.”

⁶Wele Omunyali Owa Bioosi aboola ali, “Baandu ba Isiraeli, enywe mwakholile bumayaanu khwise ne khukhumbingania. Ne luno khemungobolele.

⁷Siise silikho sicha, nisio enywe mweesi mulimwaatilakho bifwaani bie bumayaanu ebio, nibio mwang'oona khukhwama khu fwesa ne khu sahabu.

⁸Ashuru silibunisibwa mwiie, ne kakhali se aliio omundu olisibunia tawe, Baashuru balilukha khukhwama mwiie, ne baele babwe baliambwa babakhole nasioobi.

⁹Omwami wabwe alilukha mu buri, ne babemeelesi baliba ne buuri bukali, mala belukhe balekhe chipendera chabwe che liie.” Wele Omunyali Owa Bioosi alomile, Wele Omunyali Owa Bioosi niye besaayanga mu Yerusalemu ne niye kumulilo kwewe kuburukhanga khulwe chimbosio.